Bachchu Kadu In Goa : महाराष्ट्रात घडत असलेले राजकारण सामान्य जनतेच्या बुद्धीबाहेरचे आहे. त्यामुळे जनता संभ्रमित झाली आहे, असे मत महाराष्ट्रातील माजी मंत्री बच्चू कडू यांनी व्यक्त केले आहे.

दिव्यांगांचे केंद्रीय पातळीवरचे संघटन करण्यासाठी बच्चू कडू आपल्या प्रहार संघटनेच्या कार्यकर्त्यांसह गोव्यात आले आहेत. त्यांनी स्थानिक दिव्यांग संघटनांशी चर्चा केली.

महाराष्ट्रात हे घडत आहे ते लोकांच्या बुद्धीच्या बाहेरचे आहे. याला लोक त्रासलेले आहेत. यातून वाईट काही घडू नये इतकीच अपेक्षा. आपल्या पक्षहितासाठी आधी सोबत घेतलेल्यांना नाराज करण्याचे काम काहीजण करत आहेत. शपथविधी करायचाच होता तर तो सर्वांना घेऊन करायला हवा होता, अशी टीका भाजपाचे नाव न घेता कडू यांनी केली. पुन्हा गुवाहाटी करायला लावू नये, असा इशाराही त्यांनी दिला.

2024 मध्ये बदल घडेल

2024 च्या लोकसभा निवडणुकीमध्ये जनता कोणाला निवडून देईल व भाजपच्या विरोधात विरोधी पक्षांचे एकत्रीकरण कसे होईल? यावरतीच केंद्रातील सत्ता अवलंबून आहे.

केंद्रातील सत्ता बदलल्यास महाराष्ट्र आणि इतर राज्यांतही मोठे बदल होतील, असा अंदाजही कडू यांनी व्यक्त केला आहे. याशिवाय वंचित बहुजन आघाडी आणि भारत राष्ट्र समितीच्या वतीने महाराष्ट्रात निवडणुका लढवणार असल्याचे जाहीर केले आहे.