Water Scarety :

म्हापसा, आसगाव व हणजूण या किनारपट्टीच्या गावांमध्ये सार्वज नियमित पाणीपुरवठ्याच्या टंचाईमुळे पाण्याच्या टँकर व्यवसायाला मोठी चालना मिळाली आहे.

परिणामी, लोकप्रतिनिधी व त्यांचे नातेवाइकांचा या महत्त्वाच्या स्रोतांतून नफा कमावण्याचा सहभाग वाढला आहे.

दरम्यान, खासगी पाण्याच्या टँकरचे दर ७०० रुपयांपासून दीड हजार रुपये व पिण्याचा पाण्याचा टँकरचे दर वेगळे अशा पद्धतीने पाणी विकण्यात येत असून त्यावर कुणाचेच नियंत्रण दिसून येत नाही. एकप्रकारे टँकर व्यावसायिकांना सध्या सुगीचे दिवस आले आहेत.

सध्या हणजूण, आसगाव भागात पाण्याचा प्रश्न दिवसेंदिवस गंभीर होत चालला असून याचा काही लोकप्रतिनिधींनी पाण्याच्या नितांत गरजेचा गैरफायदा घेत पाण्याच्या टँकरच्या किफायतशीर व्यापारात प्रवेश केला आहे, असे समजते. हे लोकप्रतिनिधी त्यांच्या नातेवाइकांसह स्थानिक रहिवाशांनाच नव्हे, तर हॉटेल व इतर व्यावसायिक आस्थापनांनाही पाणी पुरवतात, असे समोर आले आहे.

आसगाव येथील रहिवासी, एर्विन फोन्सेको यांनी यात पंचायत सदस्यांचा सहभाग हे उघड गुपित आहे याकडे लक्ष वेधले. गावातील प्रत्येकाला याची माहिती आहे की पंचायत सदस्य कोण आहेत, जे पाण्याच्या टँकरचा व्यवसाय करतात आणि ते किती टँकर चालवतात, असेही फोन्सेको म्हणाले.

तसेच हणजूणमध्ये पंचायत सदस्यांची टँकरची थेट मालकी कमी असली तरी त्यांचे नातेवाईक पाण्याच्या टँकर व्यवसायात आहेत.

विहिरी, बोअरवेललमधून पाणी उपसा

१ पाण्याच्या टँकरचा प्रसार चिंताजनक पातळीवर पोहोचला आहे. ज्यामुळे वाहतूक प्रवाहात व्यत्यय येतो. ऑपरेटर खासगी विहिरी आणि बोअरवेलचे बिनदिक्कतपणे पाणी उपसा करत असल्याने भूगर्भातील पाण्याचा साठा कमी होत आहे.

२बांधकाम व हॉटेल प्रकल्पांना पाणीपुरवठा करण्यासाठी एक सोईस्कर उपाय म्हणून याची सुरवात झाली होती. आज हा धंदा बनला असून याचे स्थानिक लोकांवर विपरीत परिणाम झालेत.

३ हे टँकर चालक, वेळ व एकमेकांमध्ये स्पर्धा करीत अरुंद रस्त्यांवरून अत्यंत वेगाने मार्गक्रमण करतात. ज्यामुळे इतर वाहनचालकांना जीव मुठीत धरुन वाहने हाकावी लागतात.

४टँकरचा प्रसार चिंताजनक पातळीवर पोहोचला आहे, दर पाच मिनिटांनी एक टँकर येथील रस्त्यावर धावताना दिसतो.