हरमल: हरमल येथे रशियन नागरिकाने आपल्या मैत्रिणीची निर्घृण हत्या केल्याची धक्कादायक घटना समोर आली आहे. अलेक्सेई लिओनोव्ह असे अटक करण्यात आलेल्या आरोपीचे नाव असून, त्याने एलेना कस्थानोव्हा हिचा खून केल्याचा आरोप आहे.

पोलीस सूत्रांनी दिलेल्या माहितीनुसार, ही घटना १५ जानेवारी २०२६ रोजी रात्री साडेनऊच्या सुमारास घडली. आरोपी अलेक्सेई याने एलेनावर जीवघेणा हल्ला केला. तिचे हात दोरीने मागे बांधले. त्यानंतर धारदार शस्त्राने तिच्या मानेवर वार करत गंभीर जखमा केल्या अशी माहिती मिळाली आहे. या हल्ल्यात एलेनाचा जागीच मृत्यू झाला.

या प्रकरणी हरमल येथील उत्तम नाईक यांनी पोलिसांत तक्रार दाखल केली. त्यानुसार गुन्हा क्रमांक ०५/२६ अंतर्गत भारतीय न्याय संहिता (BNS) कलम १२६(२) आणि १०३(१) अन्वये गुन्हा नोंदविण्यात आला आहे. ही घटना भाड्याने दिलेल्या घरात घडली आहे असे समजते.

घटनेनंतर पोलिसांनी तात्काळ कारवाई करत आरोपीला अटक केली असून, तो सध्या पोलीस कोठडीत आहे. हत्येमागील नेमके कारण अद्याप अस्पष्ट असून, पोलिसांकडून पुढील तपास सुरू आहे. या घटनेमुळे हरमल परिसरात खळबळ उडाली आहे.