मोरजी: पेडणे तालुक्यातील डोंगर-माळरान, भरड शेती आणि शेतजमिनी बिगर गोमंतकीयांकडून मोठ्या प्रमाणात विकत घेतल्या जात असून, त्यानंतर सरकारी पातळीवर झोन बदलून देण्याची प्रक्रिया वेगाने सुरू असल्याचा आरोप स्थानिक नागरिकांनी केला आहे.

हरमल-भटवाडीतील सर्वे क्रमांक २४२/० व २४२/१ मधील तब्बल तीन लाख चौरस मीटर डोंगर भागातील जमीन विकत घेऊन झोनिंग बदलण्यात आल्याने परिसरात मोठे आंदोलन पेटले आहे. येथील भूखंड विक्री थांबवावी, अशी मागणीही ग्रामस्थांनी केली.

या संदर्भात जागृत नागरिकांनी विविध मार्गांनी आंदोलन छेडत मुख्यमंत्री डॉ. प्रमोद सावंत यांची आमदार जीत आरोलकर यांच्या उपस्थितीत भेट घेऊन लेखी निवेदन सादर केले. या भेटीत ग्रामस्थांवर कोणताही अन्याय होऊ देणार नाही आणि संबंधित झोन रद्द करण्याची कार्यवाही केली जाईल, असे आश्वासन मुख्यमंत्र्यांनी दिल्याची माहिती ग्रामस्थांनी दिली.

स्थानिकांच्या तक्रारीनंतर आमदार जीत आरोलकर हे मागील वर्षभर या प्रकरणात सातत्याने पाठपुरावा करत असून, त्यांनीच मुख्यमंत्री सावंत यांच्याकडे ही बाब मांडल्याचे सांगण्यात आले. नागरिकांनी पेडणे तालुक्यातील बिगर गोमंतकीयांनी विकत घेतलेल्या सर्व जमिनींचे झोन मूळ स्थितीत आणावेत, अशी मागणी केली आहे.

डोंगराचे संवर्धन आवश्‍यक

भटवाडी-हरमल परिसरातील डोंगर-माळरान हा महत्त्वाचा जलस्रोत असल्याचे स्थानिकांचे म्हणणे आहे. मोरजी पंचायत हद्दीत ३५ हून अधिक बोरवेल असून, जंगल आणि डोंगर पाण्याचा मुख्य स्त्रोत आहेत. या नैसर्गिक संपत्तीचे जतन न झाल्यास भविष्यात गंभीर पर्यावरणीय हानी होण्याची भीती नागरिकांनी व्यक्त केली. हरमल भागात पर्यटकांची वाढलेली संख्या आणि मुबलक पाणीसाठा लक्षात घेता डोंगराचे संवर्धन आवश्यक असल्याचेही त्यांनी सांगितले.