गोव्यात पाण्याची कमतरता सध्या जरी भासत नसली तरी पाण्याचा सांभाळ करणे महत्त्वाचे आहे. पुढील 20 वर्षांसाठी संपूर्ण गोव्यासाठी पाणी पुरेल यासाठी आतापासूनच सजग राहण्याचे आवाहन जलस्रोतमंत्री सुभाष शिरोडकर यांनी केले.

चिंचोणे येथील सेंट सेबस्तियन चर्चजवळील पाटो येथील 30 हेक्टर शेतजमीन लागवडीखाली आणण्याच्या योजनेचा शुभारंभ केल्यानंतर जलस्रोतमंत्री सुभाष शिरोडकर प्रमुख पाहुणे म्हणून उपस्थित होते. या कार्यक्रमाला आमदार क्रुझ सिल्वा, सरपंच वालेंतीन बार्रेटो व इतर मान्यवर तसेच नागरिक उपस्थित होते.

जलस्रोत खात्यातर्फे गोव्यातील तळी, झरे, कालवे स्वच्छ करणे त्यासाठी साधनसुविधा उपलब्ध करण्यासाठी प्रयत्न चालू आहेत. साळावली येथील धरणाची उंची वाढविण्यात येईल तर धारबांदोडे-काजूमळ येथील धरणाच्या बांधकामाचा पाया डिसेंबर 2023 मध्ये रचला जाणार असल्याची घोषणा जलस्रोतमंत्र्यांनी येथे केली.

युवकांनी शेतीला प्राधान्य देणे अत्यंत गरजेचे आहे. चिंचोणे येथील युवकांनी शेती लागवडीसाठी जो पुढाकार घेतला आहे त्याबद्दल त्यांचे अभिनंदन करतो. गोव्यात जास्तीत जास्त जमीन शेती लागवडीखाली आली पाहिजे. जलस्रोत संचालनालय यासाठी सर्वतोपरी मदत करेल.

- सुभाष शिरोडकर, जलस्रोतमंत्री