गोव्यात मागील तीन दिवसांपासून अपघाताचे सत्र सुरू आहे. झुआरी अपघातानंतर आज सकाळी चिखली येथे झालेला अपघात आणि आता दाबोळीत वेल्स जंक्शनला कार धडकून अपघात झाल्याची माहिती समोर आली आहे. वेल्स जंक्शनवरील सिग्नलला धडकून हा अपघात झाला आहे. या अपघाताचा व्हिडिओ समोर आला असून, सिलव्हर रंगाची स्विफ्ट कार अपघआतग्रस्त अवस्थेत दिसून येत आहे. तसेच, सिग्नल देखील कोलमडून पडल्याचे दिसत आहे. (Another car accident at Dabolim, on airport road)

दाबोळी आंतरराष्ट्रिय विमानतळ रस्त्यावर हा अपघात झाला आहे. अपघाताची वेळ आणि कारण अद्याप समजू शकले नाही. तसेच, या अपघातात किती लोक जखमी झाले आहेत हे देखील अस्पष्ट आहे.

दरम्यान, बुधवारी रात्री झुआरी पुलावरून नदीत कार कोसळली, त्यात चार लोकांनी आपला जीव गमावला. बारा तासांच्या शोध मोहिमेनंतर ही कार नदीतून बाहेर काढण्यात आली. तर आज (शुक्रवारी) पहाटे चिखलीतील रिमा बारजवळच असलेल्या सांडपाण्याच्या पुलावरुन कार नाल्यात कोसळली. या अपघातात चार जण गंभीर जखमी झाले असून त्यांना उपचारासाठी गोमेकॉत दाखल करण्यात आलं आहे.