पणजी : देशासह गोव्यातही ध्रुवीकरण वाढत असल्याने धार्मिक तणाव वाढण्याची शक्यता आहे. यासाठी गोवा प्रदेश काँग्रेस समितीने घेतलेल्या दोन दिवसीय नवसंकल्प शिबिरात ‘गोवा जोडू या, एकसंध राहू या’, असा नारा काँग्रेस प्रदेशाध्यक्ष अमित पाटकर यांनी दिला. (Amit Patkar press conference Congress goa)

पणजी येथे घेतलेल्‍या पत्रकार परिषदेत ते बोलत होते. यावेळी सोबत पक्षाचे प्रवक्ता कॅ. विरियातो फर्नांडिस, पक्षाचे नेते एल्विस गोम्स, नेते ॲड. श्रीनिवास खलप, महिला काँग्रेस अध्यक्ष बिना नाईक आणि युवा काँग्रेस अध्यक्ष ॲड. वरद म्हार्दोळकर उपस्थित होते.

नवसंकल्प शिबिरात प्रामुख्याने 2024 लोकसभा आणि 2027 गोवा विधानसभा निवडणुकीच्या तयारीवर लक्ष केंद्रित करण्यात आले आहे. यात सर्व 40 मतदारसंघामध्ये बूथ स्तरापासून पक्ष संघटनेची बांधणी केली जाईल. 2024 लोकसभा निवडणुकीत उत्तर आणि दक्षिण गोव्यातील दोन्ही जागा जिंकण्याचे लक्ष, तसेच 2027 गोवा विधानसभा निवडणुकीत किमान 27 जागा जिंकण्यासाठी धोरणात्मक तयारी केली जाणार आहे. तर, अनुसूचित जाती आणि जमाती, इतर मागासवर्गीय समुदायांना त्यांच्या हक्कापासून वंचित ठेवले जाणार नाही याची काळजी पक्ष घेणार आहे, असे पाटकर यांनी स्‍पष्ट केले.

मोदी सरकारने काँग्रेसच्या राष्ट्रीय अध्यक्षा सोनिया गांधी यांना ईडीने पाठवलेल्या नोटिसीबद्दल सरकारच्या कृतीविरोधात ठराव घेतला आहे, अशी माहिती ॲड. श्रीनिवास खलप यांनी दिली.

भाजपात आंतरिक कलह : सरकार पक्षात आणखी पाच आमदारांची भर पडणार असे विधान गोवा भाजपचे प्रभारी सी. टी. रवी यांनी केले होते. परंतु, भाजपमध्ये सध्या आंतरिक कलह सुरू असल्यानेच अशा प्रकारची विधाने करत आहेत, असा दावा काँग्रेस प्रदेशाध्यक्ष अमिती पाटकर यांनी केला.