Mopa Airport Flight Taxiway Incident

पणजी: मोपा येथील मनोहर आंतरराष्ट्रीय विमानतळावर धावपट्टीऐवजी टॅक्सीवेवरुन उड्डाण करण्याच्या प्रयत्नात होऊ शकणारा अपघात टळला आहे. गुरुवारी पहाटे घडलेली ही घटना आज संकेतस्थळावर याची माहिती दिली जाताच उघड झाली आहे.

संकेतस्थळावरील माहितीनुसार, एअर इंडियाच्या पायलटांनी चुकून रनवेऐवजी टॅक्सीवेवरून टेकऑफ करण्याचा प्रयत्न केला. मात्र, सतर्क एअर ट्रॅफिक कंट्रोलरने ही चूक लक्षात आणून दिल्यामुळे मोठा अपघात टळला.

एअर इंडियाचे विमान गोवा ते हैदराबाद या प्रवासासाठी तयार होत होते. हे विमान एअरबस प्रकाराचे होते. विमानाने रनवे ऐवजी टॅक्सीवे वरून टेकऑफ करण्याचा प्रयत्न केला. टेकऑफच्या वेळी विमानाचा वेग १०० नॉट्सपेक्षा जास्त होता आणि विमान उड्डाणासाठी सज्ज होत असताना हवाई वाहतूक नियंत्रकाने त्वरित सूचना दिली. पायलटांनी तातडीने टेकऑफ थांबवले आणि विमान सुरक्षितपणे थांबवण्यात आले.

त्यानंतर रनवेचा वापर करून विमानाला टर्मिनलवर परत आणण्यात आले. एअर इंडियाने हे उड्डाण रद्द केले. या घटनेत कोणत्याही प्रवाशांना किंवा कर्मचाऱ्यांना इजा झाली नाही.

भारतीय नागरी उड्डाण महासंचालनालयाने या घटनेची गंभीर सुरक्षा उल्लंघन म्हणून नोंद घेतली आहे आणि तपास सुरू केला आहे. एअर इंडियाला या घटनेवरील सविस्तर अहवाल सादर करण्याचे आदेश दिले आहेत.

ही घटना एअर ट्रॅफिक कंट्रोलच्या सजगतेमुळे मोठा अपघात टळल्याचे उदाहरण ठरली आहे.