मांद्रे : गोवा पोलिसांनी हरियाणामधील एका उच्चपदस्थ सरकारी अधिकाऱ्याची तोतयागिरी करणाऱ्या इसमाला अटक केली आहे.फरिदाबादचा रहिवासी असलेल्या मिरनांक सिंग याने स्वतः एक उच्चपदस्थ सरकारी अधिकारी असल्याचे भासवून आश्वेमधील एका बीच रिसॉर्टची २.०९ लाख रुपयांची फसवणूक केली. शिवाय आपण सरकारी अधिकारी असल्याचे सांगून २ ते ४ जानेवारी २०२५ या कालावधीत बीच रिसॉर्टकडून नि:शुल्क निवास आणि सुविधा उपलब्ध करवून घेतल्या.

एक सरकारी अधिकारी असल्याचं भासवून मिरनांक सिंग याने बीच रिसॉर्टमधून तीन-चार दिवसांसाठी निवासीची तसेच इतर सुविधांची सोय करवून घेतली, शेवटी रिसॉर्ट सोडण्याच्यावेळी संशयित आरोपी मिरनांक सिंग याने एकूण २.०९ लाख रुपयांची फसवणूक केली असल्याची बाब उघड झाली.

रिसॉर्टवाल्यांनी देखील याची माहिती मिळताच ताबडतोब पोलिसांमध्ये तक्रार नोंदवली आणि म्हणूनच वेळीच आरोपी पोलिसांच्या कचाट्यात सापडला.

यापूर्वी कळंगुट परिसरातील शॅक्‍स तसेच क्लबचालकांना ‘आयएएस’ अधिकारी असल्याचे सांगून ब्लॅकमेल करणाऱ्या व त्यांची आस्थापने बंद करण्याची धमकी देणाऱ्या मनोज कुमार (वय ३१ वर्षे, रा. छत्तीसगड) याला कळंगुट पोलिसांनी अटक केली होती.