Mormugao : मुरगाव पत्तन प्राधिकरणाच्या धक्का क्र 9 समुद्रात मालीम जेटीवरील मच्छिमार बोटीवरील कामगाराचा मृतदेह आढळला आहे. मुरगाव हार्बर किनारी पोलिसांनी मृतदेहाचा पंचनामा करून उत्तरीय तपासणीसाठी मडगांव हॉस्पिसियो रुग्णालयात पाठवून दिला आहे.

गेल्या आठवड्यात मालीम जेटीवरील मच्छिमार बोटीवर काम करणारा खलाशी मनोहर अमरॉन हा मासळी पकडण्यासाठी मच्छिमार बोटीवरून मासळी पकडताना समुद्रात पडला. तेव्हापासून मनोहर अमरॉन गायब असल्याची तक्रार मालीम जेटीवरील मासळी व्यवसायिकांनी पोलिसात दाखल केली होती.

सोमवार (दि.16) मुरगाव बंदरातील धक्का क्र: ९ वरील जेटीवर एका अज्ञाताचा मृतदेह आढळला. याप्रकरणी मुरगाव बंदरातील अधिकाऱ्यांनी मुरगाव हार्बर किनारी पोलिस स्थानकाला माहिती दिली. किनारी पोलिस व इतरांनी मिळून समुद्रातील मृतदेह बाहेर काढला.

नंतर मुरगाव हार्बर किनारी पोलिस निरीक्षक प्रदीप वेळीप यांनी अज्ञाताच्या मृतदेहाची सखोल चौकशी सुरू केली. गेल्या आठवड्यात मालीम जेटीवरील मच्छिमारीसाठी गेलेल्या मनोहर अमरॉन खलाशी मासळी पकडताना समुद्रात पडला होता.

याविषयी पोलिसात तक्रार दाखल करण्यात आली होती. किनारी पोलिसांनी त्वरीत मालीम जेटीवर संपर्क साधला व तेथील मासळी पकडणाऱ्यांकडून मृतदेहाची ओळख पटवून घेतली. सदर मृतदेह मालीम जेटीवर काम करणारे मनोहर अमरॉन (झारखंड) यांचा असल्याची ओळख पटली. मुरगाव हार्बर किनारी पोलिस निरीक्षक प्रदीप वेळीप याप्रकरणी पुढील तपास करीत आहे.