Porvorim : महिलांनो घराबाहेर पडताना काळजी घ्या; राज्यात सोनसाखळी चोरांचा सुळसुळाट

Porvorim : सध्या चोरांचा सुळसुळाट वाढला असून दुचाकीवरून चोरटे चालत जाणाऱ्या महिलांना गाठून त्यांचे दागिने ओढण्याचा हिसकावून घेण्याचे प्रकार हल्ली वाढत आहेत. बार्देशमध्ये सोनसाखळी हिसकवण्याच्या प्रकाराला पुन्हा ऊत आला आहे. म्हापसा नंतर आता पर्वरीत अज्ञातांनी महिलेचे मंगळसूत्र हिसकावण्याचा प्रकार घडला आहे.

महिलेचे 2.99 लाखांचे मंगळसूत्र हिसकावून अज्ञात चोरांनी पळ काढला. याप्रकरणी पोलिस अधिक तपास करीत आहेत. असाच एक मंगळसूत्र हिसकावण्याचा प्रकार मांद्रेकरवाडा-डिचोली येथे काल घडला होता.

हळदीकुंकूसाठी घराबाहेर पडलेल्या एका महिलेचे मंगळसूत्र हिसकावण्याची घटना काल कातरवाडा-डिचोली येथे घडली होती. मांद्रेकरवाडा-डिचोली येथील श्रीमती मांद्रेकर या सायंकाळी 'हळदीकुंकू'साठी कातरवाडा येथील आपल्या एका नातलगाकडे जात होत्या.

त्यांच्या पुतण्याने तिला दूकीवरून डिचोली- सारमानस रस्त्यावरील कातरवाडा थांब्यावर सोडून तो अन्य एका महिलेला आणण्यासाठी परत गेला.

दूसरी साथीदार महिलेची वाट पाहत मांद्रेकर या महिला रस्त्यावर थांबल्या असता, दुचाकीवरून आलेल्या युवकांनी त्यांचे मंगळसूत्र हिसकावून दुचाकीसह पलायन केले. या प्रकारामुळे परिसरात भीतीचे वातावरण निर्माण झाले आहे.

मकर संक्रांतीच्या निमित्ताने महिला सध्या मोठ्या प्रमाणात दागदागिने, स्वर्ण अलंकार घालून फिरत असतात. या महिलांनी चोरांपासून सावधगिरी बाळगावी. संशयित व्यक्तीबद्दल तत्काळ पोलिसांशी संपर्क साधावा असे आवाहन पेडणे पोलीस निरीक्षक दत्ताराम राऊत यांनी केले आहे.