मडगाव: खेळता खेळता आपल्या मित्राचा घेतलेला मोबाईल हातून पडून फुटल्याने कोणीतरी रागावेल या भीतीपोटी एका आठ वर्षीय मुलाने आपल्या आईचा दुपट्टा गळ्याभोवती आवळून आत्महत्या केली. नेसाय येथे काल सायंकाळी ही घटना घडली. या धक्कादायक घटनेमुळे संपूर्ण गोवा राज्य हादरुन गेले. (8-year-old boy committed suicide In Goa)

मूळ उत्तर प्रदेश (UP) येथील एक कामगार कुटुंब नेसाय येथे एका भाड्याच्या खोलीत राहत होते. त्यांना एक मुलगा आणि दोन मुली अशी अपत्ये होती. मित्रासोबत खेळताना त्यांच्या मुलाकडून मोबाईल फुटला. त्यानंतर हा मुलगा धावत आपल्या खोलीत गेला. त्याने आईचा दुपट्टा घेतला व जवळच्या मैदानात जाऊन त्याने दुपट्ट्याने आपला गळा आवळला अशी माहिती समोर आली आहे. दरम्यान, या आठ वर्षीय मुलाला मडगाव येथील जिल्हा रुग्णालयात उपचारासाठी आणले असता, त्याचे निधन झाल्याचे सांगण्यात आले.

एका आठ वर्षांच्या मुलाने आत्महत्या करणे ही मनाला चटका लावणारी गोष्ट आहे. हे वय साधकबाधक विचार करू शकणारे नव्हे. अनेकदा अशी मुले अशा आत्महत्येच्या गोष्टी ऐकतात किंवा पाहतात. त्याचा प्रभाव त्यांच्या मनात खोलवर होत असतो. त्यांच्या हातून काही चुका होतात. त्यावेळी त्यांनाही तसेच करावेसे वाटते. अशा मुलांना खरे तर पालक आणि समाजाने धीर देण्याची गरज असते. मुलांचे मोबाईलमध्ये सतत डोकावणे घातक आहे.

डॉ.राजेंद्र हेडगे, मानसोपचार तज्ज्ञ