पणजी : उत्तर गोव्यातील हरमल येथे भाड्याच्या खोलीत एका रशियन महिलेचा निर्घृण खून झाल्याची घटना उघडकीस आल्यानंतर अवघ्या काही तासांत तिच्या जोडीदाराला अटक करण्यात आली होती.

अलेक्सेई लिओनोव (वय ३७, रशियन नागरिक) असे अटक करण्यात आलेल्या आरोपीचे नाव असून, त्याने आणखी एका रशियन महिलेच्या हत्येची कबुली दिल्याने एकच खळबळ उडाली आहे.

पोलिसांच्या माहितीनुसार, गुरुवारी हरमलमधील भाड्याच्या खोलीत एलिना कास्थानोव्हा (वय ३७) हिचा मृतदेह घरमालकाला आढळून आला. तिचे दोन्ही हात पाठीमागे बांधलेले होते, तर गळा धारदार शस्त्राने चिरलेला होता. या घटनेनंतर पोलिसांनी तपासाची चक्रे वेगाने फिरवत शुक्रवारी पहाटे सुमारे चारच्या सुमारास लिओनोवला ताब्यात घेतले.

चौकशीत लिओनोवने दुसऱ्या एका महिलेच्या हत्येची कबुली दिल्यानंतर पोलिसांना त्याच्या मार्गदर्शनाखाली मोरजी परिसरात एलिना वानेयेवा (वय ३७) हिचा मृतदेह सापडला. दोन्ही महिला रशियन नागरिक असून त्या काही काळापासून गोव्यात वास्तव्यास होत्या.

खुनामागील नेमका हेतू अद्याप अस्पष्ट असून तपास प्राथमिक टप्प्यात आहे. हत्या करण्यासाठी वापरलेले शस्त्र, घटनास्थळावरील पुरावे आणि आरोपीचे मानसिक स्थिती यांचा तपास सुरू आहे. दोन्ही मृतदेह शवविच्छेदनासाठी पाठवण्यात आले असून, आरोपीविरुद्ध भारतीय न्याय संहिता कलम १०३ (खून) आणि १२६ (२) (बेकायदेशीर डांबून ठेवणे) अंतर्गत गुन्हा दाखल करण्यात आला आहे.