Goa Taxi Driver Assaulted : अनेकदा गोव्यातील टॅक्सी दरावरुन आणि टॅक्सी चालकांच्या वर्तणूकीवरून त्यांना बोलले जाते. गोव्यात येणाऱ्या पर्यटकांनी अनेकदा गोव्यातील टॅक्सी चालकांबद्दल नाराजीही व्यक्त केली आहे.

पण प्रत्येकवेळी चालकांचीच चूक असते असं नाही. अशीच एक घटना गोव्यात घडली आहे. महाराष्ट्रातील दोघांनी एका टॅक्सी चालकाला मारहाण केल्याचा धक्कादायक प्रकार समोर आला आहे.

माहितीनुसार, महाराष्ट्रातील दोघांनी गोव्यातील टॅक्सी चालकाला मारहाण करून त्याच्या वाहनासह पणजी येथून पळ काढला होता.

त्यानंतर गोवा पोलिसांची यंत्रणा सज्ज झाली असून त्यांनी निखिल विजय शेट्टी (22) याला सोलापूर, महाराष्ट्र आणि वैभव जव्हेरी (23) याला महाराष्ट्रातील इचलकरंजी येथून आपल्या ताब्यात घेतले आहे.

अॅन्टोनियो रॉड्रिग्स (54) हे सासष्टी येथील रहिवासी असून यांनी या घडल्या प्रकाराबद्दल तक्रार दाखल केली होती. 6 जानेवारी रोजी दुपारी 2.15 च्या सुमारास, दोन अज्ञात व्यक्तींनी आपण ग्राहक असल्याचे सांगत त्यांच्यावर हल्ला केला आणि त्यानंतर त्यांची कार घेऊन पळ काढला.

हा सर्व प्रकार सीसीटीव्हीमध्ये कैद झाला आणि आंतरराज्य गुप्तचर सूत्रांना सतर्क करण्यात आले. वर्णन केल्याप्रमाणे साजेशी गाडी सोलापुरात पोलिसांना आढळून आली. गाडीला नंबर प्लेट नव्हती. मग गोव्यातील एक पथक तिथे पाठवून महाराष्ट्र पोलिसांच्या मदतीने आरोपींना अटक करण्यात आले आहे.