बेती पर्वरी येथील 18 वर्षीय युवक सत्तरीतील वेळगे नदीच्या पात्रात बुडाल्याची घटना समोर आली आहे. वाळपई अग्निशमक दलाने रात्री उशिरापर्यंत शोध मोहिम राबवली मात्र युवकाचा ठावठिकाणा लागला नाही.

याबाबत अधिक माहिती अशी की, रविवारच्या सुट्टीच्या दिवशी बेती पर्वरी येथील 18 वर्षीय युवक शिवकुमार पवार व त्याच्या मित्रांचा ग्रुप वेळगे सत्तरी येथील राजग्योची कोंड या म्हादई नदी परिसरात आले होते. पोहण्यासाठी नदीत उतरले होते. त्यापैकी शिवकुमार हा नदीच्या प्रवाहात वाहून गेला तर आणखीन एकाला बुडताना वाचविण्यात साथीदारांना यश मिळाले.

घटनेची माहिती मिळताच वाळपई अग्निशमन दलाच्या जवानांना घटनास्थळी पाचारण करण्यात आले. शिवकुमार याचा शोध करण्यात आला. मात्र रात्र झाल्याने शोध मोहीम थांबविण्यात आली.

स्थानिकांनी दिलेल्या माहितीनुसार, येथील नदीच्या पात्रात भोवरा पडत असतो व अधून मधून पाण्याचा मोठा झोत मारत असतो तसेच या भागात मगरींचा वावरही असतो. बुडालेल्या युवकाला काठीचा आधारही देण्यात आला होता. पण त्यात यश मिळाले नाही.