पणजी: गोव्यात गेल्या सात महिन्यात एक हजार ५०५ म्हशींची कत्तल करण्यात आली आहे. दोन महिन्यात राज्यातून विदेशात २८.५ टन मांस निर्यात करण्यात आले आहे, अशी माहिती पशु संवर्धन आणि मत्स्यव्यवसाय मंत्री नीळकंठ हळर्णकर यांनी दिली आहे. विधानसभेत विचारलेल्या प्रश्नाला त्यांनी लेखी उत्तर दिले आहे.

सध्या सुरु असलेल्या पावसाळी अधिवेशनात याबाबत प्रश्न उपस्थित करण्यात आला होता. मंत्री हळर्णकर यांनी दिलेल्या उत्तरानुसार, जानेवारी ते जुलै २०२५ दरम्यान राज्यात १,५०५ म्हशींची कत्तल करण्यात आली. फेब्रुवारी २०२५ मध्ये इराकमध्ये २८.५ टन बोनलेस मांस निर्यात करण्यात आले. दरम्यान, मार्चमध्ये निर्यात नोंद झाली नसल्याचे उत्तरात नमूद करण्यात आले आहे.

एप्रिलमध्ये ७३ म्हशी, मेमध्ये ६७९, जून महिन्यात १२६ आणि जुलैमध्ये आत्तापर्यंत १२६ म्हशींच्या कत्तलीतून निर्माण झालेले मांस निर्यात करण्यात आले, अशी माहिती मंत्री हळर्णकरांनी सभागृहात दिली.

उसगाव – फोंडा येथे असलेल्या गोवा मीट कॉम्पलेक्समध्ये केवळ म्हशींची कत्तल केली जाते असेही, मंत्र्यांनी स्पष्ट केले.

मीट कॉम्पलेक्समध्ये दिवसाला ३०० जनावरे कत्तल करण्याची क्षमता आहे. सध्या मीट कॉम्पलेक्सची जबाबदारी सनफेस अग्रोफूड्स प्रा. लि. यांच्याकडे असल्याची माहिती त्यांनी दिली. येथे अत्याधुनिक प्रक्रिया उपकरणे, पॅकेजिंग युनिट आणि फ्रिजिंग तंत्रज्ञान उपलब्ध करुन देण्यात आले आहे.

गोव्यातून होणाऱ्या मांस निर्यातीवर २० ते २५ वर्षापूर्वी बंदी घालण्यात आली होती. दरम्यान, सर्व सोपस्कर पूर्ण झाल्यानंतर आता राज्यातून केवळ म्हशीचे मांस निर्यात केले जाते, अशी माहिती उत्तरात देण्यात आली आहे.