पणजी: आय-लीग फुटबॉल स्पर्धेत अपात्र खेळाडूला संघात स्थान दिल्याबद्दल अखिल भारतीय फुटबॉल महासंघाच्या (एआयएफएफ) अपिल्स कमिटीने इंटर काशी संघावर पुन्हा एकदा कडक कारवाई केली, त्यामुळे विजेतेपदाच्या शर्यतीत गोव्यातील चर्चिल ब्रदर्स संघाचे अग्रस्थान भक्कम झाले.

आय-लीग स्पर्धेच्या गुणतक्त्यातील नव्या समीकरणामुळे चर्चिल ब्रदर्सला आय-लीग विजेते घोषित करण्याचा मार्ग मोकळा झाला आहे. आता प्रतीक्षा इंटर काशी संघाकडून होणाऱ्या अपिलाची असेल.

अपिल्स कमिटीच्या निर्णयानुसार, इंटर काशी संघाचा स्पॅनिश आघाडीपटू मारियो बार्को नोंदणीत अपात्र ठरला. त्याला आय-लीग सामन्यांत खेळविल्याबद्दल नामधारी एफसीने दाद मागितली होती. त्यांच्यानुसार बार्को हा इंटर काशीचा आय-लीग स्पर्धेतील सातवा परदेशी खेळाडू ठरला, तर नियमानुसार सहा परदेशी खेळाडू करारबद्ध करता येतात.

एक फेब्रुवारी रोजी इंटर काशीने हुआन पेरेझ डेल पिनो याचा करार संपुष्टात आणल्यानंतर बार्को याच्याशी फेरकरार केला होता. प्रतिस्पर्धी संघाच्या दाव्यानुसार एखाद्या खेळाडूस पुन्हा करारबद्ध करण्याचा नियम आय-लीगमध्ये नाही आणि त्यांनी यासंदर्भात अपिल्स कमिटीकडे दाद मागितली होती.

बार्को संघात असताना नामधारी एफसीव्यतिरिक्त चर्चिल ब्रदर्स व रियल काश्मीर या संघाविरुद्ध इंटर काशी संघ आय-लीग स्पर्धेत खेळला होता. शनिवारी एआयएफएफ अपिल्स कमिटीने नामधारी एफसीचे अपिल ग्राह्य मानताना बार्को याचा फेरकरार अयोग्य ठरविला व या तिन्ही लढतीत इंटर काशीला पराभूत ठरविण्यात आले. त्यामुळे इंटर काशीविरुद्ध २-२ गोलबरोबरीत आता चर्चिल ब्रदर्सला विजयी मानले जाणार असून त्यामुळे त्यांची एकूण गुणसंख्या ४० वरून सर्वाधिक ४२ झाल्याने अग्रस्थान स्थान कायम राहील.

चर्चिल ब्रदर्सकडून निर्णयाचे स्वागत

दरम्यान, चर्चिल ब्रदर्स एफसी गोवा संघाने एआयएफएफ अपिल्स कमिटीच्या शनिवारच्या निर्णयाचे स्वागत केले आहे. न्याय प्रक्रियेतील हा विजय आपले निष्ठावंत चाहते आणि हितचिंतकांना समर्पित असल्याचे चर्चिल ब्रदर्सने सोशल मीडियावर नमूद केले आहे.