पणजी: सलामीचा ॲरन जॉर्ज व सिद्धार्थ राव चेप्याला यांनी शानदार शतके नोंदविताना द्विशतकी भागीदारी रचली. त्यामुळे गोव्याविरुद्ध कुचबिहार करंडक १९ वर्षांखालील क्रिकेट सामन्यात यजमान हैदराबादला पहिल्या दिवसअखेर भक्कम टप्पा गाठता आला.

चार दिवसीय सामन्याला बुधवारपासून हैदराबाद जिमखाना मैदानावर सुरवात झाली. पहिल्या दिवसाचा खेळ थांबला तेव्हा हैदराबादने ५ बाद ३७३ अशी दमदार धावसंख्या उभारली होती. अखेरच्या सत्रात यजमान संघाने १४ धावांत दोन विकेट गमावल्यामुळे गोव्याला थोडाफार दिलासा मिळाला, पण ॲरन नाबाद असल्याने गोलंदाजांची चिंता कायम आहे.

ॲरन जॉर्ज १८२ धावांवर खेळत आहे. त्याने २२६ चेंडूंचा सामना करताना तब्बल २५ चौकार लगावले. सिद्धार्थ १०१ धावांवर बाद झाला. त्याने १९५ चेंडूंत १५ चौकार मारले. ॲरन व सिद्धार्थ यांनी दुसऱ्या विकेटसाठी २०९ धावांची भागीदारी करून गोव्याच्या गोलंदाजांना सतावले. परिणामी नाणेफेक जिंकून प्रथम गोलंदाजीचा निर्णय पाहुण्या संघाच्या अंगलट आला.

संक्षिप्त धावफलक

हैदराबाद, पहिला डाव: ९० षटकांत ५ बाद ३७३

(ॲरन जॉर्ज नाबाद १८२, वाफी कच्छी १९, सिद्धार्थ राव चेप्याला १०१, प्रद्युम्न चिलमकुर्टी १५, बी. सचित २५, अलंकृत रापोले १०, निशांत रेड्डी नाबाद ९, पुंडलिक नाईक १२-३-४८-१, समर्थ राणे १०-०-५२-०, अनुज यादव २८-२-९१-१, शमिक कामत ८.२-१-५८-०, मिहीर कुडाळकर २०-१-७१-१, यश कसवणकर १०.४-०-४१-१, दिशांक मिस्कीन १-०-३-०).