गोव्याची युवा महिला बॉक्सर लक्ष्मी लमाणी हिची आशियाई ज्युनियर-शालेय पातळीवरील एएसबीसी बॉक्सिंग स्पर्धेसाठी भारतीय संघात निवड झाली आहे. स्पर्धेला संयुक्त अरब अमिरातीतील अल अईन येथे सुरवात झाली असून दहा सप्टेंबरपर्यंत चालेल.

लक्ष्मी हिने तिसऱ्या राष्ट्रीय सबज्युनियर बॉक्सिंग स्पर्धेत शानदार कामगिरी बजावताना सुवर्णपदक जिंकले होते. त्याआधारे तिची भारतीय संघात निवड झाली. लक्ष्मी हिची आर्मी स्पोर्टस इन्स्टिट्यूटमध्येही वर्णी लागली आहे.

लक्ष्मी हिने सांगितले, की ‘‘देशाचे प्रतिनिधित्व करणे माझ्यासाठी स्वप्नपूर्ती आहे. या पातळीवर येण्यासाठी मी खूप मेहनत घेतली असून गौरवास्पद वाटत आहे. सर्वोत्तम कामगिरीसह देशासाठी अभिमानास्पद कामगिरी बजावण्याचे लक्ष्य बाळगले आहे.’’ लक्ष्मी पूर्वी पर्वरी येथील एल. डी. सामंत मेमोरियल हायस्कूलमध्ये शिकत होती आणि तिला साल्वादोर द मुंद बॉक्सिंग केंद्रात चितंबरम नाईक यांचे मार्गदर्शन लाभत होते. यावर्षी एप्रिलमध्ये तिची आर्मी स्पोर्टस इन्स्टिट्यूटमध्ये निवड झाली.