पणजी: भारतातील लांब पल्ल्याच्या शर्यतीत गणली जाणारी गोवा रिव्हर मॅरेथॉन यंदा १४ डिसेंबर रोजी होणार आहे. एकंदरीत स्पर्धेची यंदा पंधरावी आवृत्ती आहे. देशविदेशातील सुमारे साडेसात हजारांहून जास्त धावपटू सहभागी होण्याचा विश्वास आयोजक वास्को स्पोर्टस क्लबचे अध्यक्ष नितीन बांदेकर यांनी गुरुवारी पत्रकार परिषदेत व्यक्त केला.

यावेळी एसकेएफ इंडियाचे व्यवस्थापकीय संचालक मुकेश वासुदेवन, वास्को क्लब सचिव राकेश उन्नी, अभिजीत साळकर, रोआना कोस्ता व इतर मान्यवर उपस्थित होते. बांदेकर म्हणाले, की ‘‘यंदा पूर्ण मॅरेथॉन (४२ किलोमीटर), २० माईलर (३२ किलोमीटर), हाफ मॅरेथॉन (२१ किलोमीटर) १० किलोमीटर आणि ५ किलोमीटर अशा पाच गटांत शर्यत होईल. ‘शांतीसाठी धाव’ ही संकल्पना असून एकूण बक्षीस रक्कम आठ लाख रुपये आहे.

गोवा रिव्हर मॅरेथॉनला ‘अबॉर्ट वर्ल्ड मेजर्स संघटने’ची अधिस्वीकृती मिळाली आहे, त्यामुळे यंदापासून जागतिक मानांकन प्रणालीची अंमलबजावणी स्पर्धेत करण्यात येणार आहे. त्यामुळे स्पर्धेची गुणवत्ता वाढेल. जागतिक पातळीवर स्पर्धेला मान्यता मिळेल.

यामुळे या स्पर्धेत सहभागी होणाऱ्या स्पर्धक धावपटूंना लंडन, बॉस्टन, न्यूयॉर्क आणि शिकागो आदी मॅरेथॉनमध्ये सहभागी होता येईल. मागील स्पर्धांचा आढावा घेतल्यास ४५ टक्क्यांनी सहभागी धावपटूंत वाढ झाली आहे. पूर्वी केवळ दोन टक्के महिला या मॅरेथॉनमध्ये सहभागी व्हायच्या, आता सहभागी महिलांची टक्केवारी २८ टक्के इतकी वाढली असल्याचे राकेश उन्नी यांनी सांगितले.