पणजी: आगामी रणजी करंडक क्रिकेट स्पर्धेतील मोहिमेसाठी गोव्याच्या संघाची तयारी अंतिम टप्प्यात आहे. स्पर्धा सुरू होण्यापूर्वी संभाव्य संघ पुणे येथे महाराष्ट्राविरुद्ध दोन सराव सामने खेळेल. गोवा क्रिकेट असोसिएशनकडून (जीसीए) प्राप्त माहितीनुसार, भारताचे माजी आंतरराष्ट्रीय क्रिकेटपटू दिनेश मोंगिया यांच्या मार्गदर्शनाखालील गोव्याचा सीनियर पुरुष संघ महाराष्ट्राविरुद्ध दोन तीन दिवसीय सराव सामने खेळेल.

महाराष्ट्र हा रणजी स्पर्धेतील मातब्बर संघ असल्यामुळे गोव्याच्या संघातील खेळाडूंच्या कामगिरीकडे सीनियर संघ निवड समिती बारकाईने लक्ष ठेवून असेल. पहिला सामना २६ ते २८ सप्टेंबर या कालावधीत, तर दुसरा सामना ३० सप्टेंबर ते २ ऑक्टोबर या कालावधीत खेळला जाईल. गोव्याची रणजी करंडक स्पर्धा मोहीम ११ ऑक्टोबरपासून सुरू होत आहे. पहिला सामना कांपाल येथील पणजी जिमखान्याच्या भाऊसाहेब बांदोडकर मैदानावर बडोदा संघाविरुद्ध होईल.

त्यानंतर एलिट अ गटात उत्तर प्रदेश, विदर्भ व बिहार या संघांविरुद्ध लढती होतील. रणजी स्पर्धा जानेवारीत पुन्हा सुरू झाल्यानंतर गोव्याचा संघ पुदुचेरी, मध्य प्रदेश व गतविजेत्या जम्मू-काश्मीर संघाविरुद्ध खेळेल. बडोदा, बिहार व पुदुचेरी या संघांविरुद्धचे सामने घरच्या मैदानावर गोव्याचा संघ खेळेल.

ओमान, कर्नाटकातील स्पर्धेत लक्षवेधी

रणजी स्पर्धा मोसमपूर्व तयारीनिमित्त गोव्याने ओमान दौरा केला. तेथे टी-२० व एकदिवसीय मालिकेत गोव्याने शानदार खेळ एकदिवसीय मालिका जिंकली. नंतर कर्नाटक राज्य क्रिकेट संघटनेच्या (केएससीए) डॉ. कॅप्टन के. थिम्माप्पिया स्मृती स्पर्धेत गोव्याने गुजरातवर दणदणीत विजय प्राप्त केला, तर केएससीए अध्यक्षीय संघ व विदर्भाविरुद्ध तुल्यबळ लढत दिल्यानंतर विजय थोडक्यात हुकला होता. 

कर्णधारपदी नवा चेहरा?

केएससीए क्रिकेट स्पर्धेतील दोन सामन्यांत नेतृत्व केलेला गोव्याचा अनुभवी फलंदाज स्नेहल कवठणकर जायबंदी झाल्यामुळे तिसरा सामना खेळू शकला नव्हता. गुजरातविरुद्धच्या विजयात अभिनव तेजराणा याने गोव्याचे कर्णधारपद सांभाळले होते. नव्या रणजी मोसमापूर्वी निवड समिती स्नेहलच्या तंदुरुस्तीकडे लक्ष ठेवून आहे, असे जीसीएतील सूत्राने नमूद केले.