पणजी: गोव्याच्या २३ वर्षांखालील क्रिकेट संघाचे फलंदाजीतील रडगाणे कायम राहिल्यामुळे कर्नल सी. के. नायडू करंडक क्रिकेट स्पर्धेत त्यांना सोमवारी सलग तिसऱ्या, तर एकंदरीत चौथ्या पराभवास सामोरे जावे लागले. तिरुअनंतपुरम येथे झालेल्या चार दिवसीय लढतीत केरळने २४३ धावांनी शानदार विजय प्राप्त करत बाद फेरी गाठण्याची शक्यताही कायम राखली.

एलिट अ गट सामन्यात गोव्यासमोर दुसऱ्या डावात ३६४ धावांचे लक्ष्य होते. सामन्याच्या तिसऱ्या दिवसअखेर ३ बाद ६३ धावा केलेल्या गोव्याचा दुसरा डाव सोमवारी सकाळच्या सत्रातच अवघ्या १२० धावांत गुंडाळला गेला. यासह केरळने स्पर्धेतील सलग तिसऱ्या विजयाची नोंद केली. त्यांच्या कैलास नायर याने फक्त २१ धावा देत ५ गडी टिपले.

या सामन्यातून केरळला एकूण १२ गुण मिळाले. यामध्ये फलंदाजीतील दोन, गोलंदाजीतील चार, तर विजयाच्या सहा गुणांचा समावेश आहे. त्यांचे आता सहा लढतीतून एकूण ४७ गुण झाले असून गटात त्यांना चौथा क्रमांक मिळाला आहे. गोव्याला पाच गुणांवर समाधान मानावे लागले.

यामध्ये फलंदाजीतील एका, तर गोलंदाजीतील चार गुणांचा समावेश आहे. ते आता एकूण २६ गुणांसह आठ संघांच्या गटात सातव्या स्थानी आहेत. गोव्याचा गटसाखळीतील अखेरचा सामना १३ फेब्रुवारीपासून जम्मू येथे जम्मू-काश्मीरविरुद्ध खेळला जाईल.

संक्षिप्त धावफलक

केरळ, पहिला डाव ः २५५

गोवा, पहिला डाव ः १७१

केरळ, दुसरा डाव ः २७९

गोवा, दुसरा डाव (३ बाद ६३ वरुन) ः ४७.३ षटकांत सर्वबाद १२० (शंतनू नेवगी २५, समर्थ राणे ३, दिशांक मिस्कीन ७, मिहीर गावडे १, अनुज यादव १३, चिगुरुपती व्यंकट ९, नित्यय कुंकळीकर नाबाद १२, कौस्तुभ पिंगुळकर ०, जे. एस. अनुराज २-२९, कैलास नायर १४.३-७-२१-५).