पणजी: गोवा क्रिकेट असोसिएशनचे (जीसीए) माजी सचिव रोहन गावस देसाई यांच्यासाठी भारतीय क्रिकेट नियामक मंडळाचे (बीसीसीआय) संयुक्त सचिवपद सात महिन्‍यांचे अल्पकालीन ठरले. जीसीए निवडणुकीतील त्यांच्या गटाचे अपयश, तसेच बीसीसीआय प्रतिनिधित्वासाठीची कायदेशीर लढाई या पार्श्वभूमीवर बीसीसीआयच्या आगामी पदाधिकारी निवडणुकीतून ते बाहेर पडले आहेत.

प्राप्त माहितीनुसार, येत्या २८ सप्टेंबर रोजी नियोजित असलेल्या बीसीसीआय निवडणुकीसाठी अर्ज भरण्यासाठी आज रविवारी संध्याकाळी चार वाजेपर्यंत मुदत होती. यावर्षी १ मार्च रोजी बीसीसीआय संयुक्त सचिवपदी बिनविरोध ठरलेले रोहन गावस देसाई यांना आणखी एका मुदतीसाठी संधी मिळण्याचे संकेत होते.

परंतु ठरलेल्या कालावधीत त्यांनी उमेदवारी अर्ज भरला नाही. बीसीसीआयच्या आगामी निवडणुकीतील कोणत्याही जागेसाठी रोहन यांना संधी मिळालेली नाही.

रोहन यांच्या जीसीए प्रतिनिधित्वाला आव्हान देणारी याचिका शनिवारी मुंबई उच्च न्यायालयाच्या गोवा खंडपीठात सादर करण्यात आली होती. ‘‘मी बीसीसीआयमध्ये वैयक्तिक नव्हे, तर गोवा क्रिकेट संघटनेचे प्रतिनिधित्व करत होतो. आता सध्याच्या समितीने गोव्याला स्थान मिळवून देण्यासाठी प्रयत्न करावेत एवढेच माझे म्हणणे आहे’’ असे रोहन म्हणाले.

होय, मी बीसीसीआय निवडणुकीसाठी उमेदवारी अर्ज भरलेला नाही. मला तशी सूचना मिळाली नाही. नेमके कारण मी सांगू शकत नाही, तरीही कायदेशीर प्रक्रियेमुळे मला संधी मिळाली नसावी. - रोहन गावस देसाई