Goa Elections: बूथ सक्षम व कार्यरत करणे, हा कुठल्याही निवडणुकीपूर्वीचा डावपेच असतो. त्याप्रमाणे दक्षिण गोव्यातील प्रत्येक मतदारसंघातील भाजप मंडळाचे पदाधिकारी किंवा जिल्हा परिषदेचे सदस्य यांनी आपल्या मतदारसंघातील बूथवर जास्त लक्ष केंद्रित करावे, असे राष्ट्रीय अध्यक्ष जे. पी. नड्डा यांनी प्रमुख कार्यकर्त्यांना मार्गदर्शन करताना आवाहन केले.

बूथ स्तरावर मतदारांच्या बैठका घेणे. बूथ समितीचे गठण करणे, मतदारांपाशी जाण्यापूर्वी त्यांच्याशी काय बोलावे, कुठले मुद्दे मांडावे, विरोधी पक्षांच्या अपयशाची माहिती देणे, या सारखे मार्गदर्शन कार्यकर्त्यांना करणे योग्य ठरेल असेही नड्डा (J.P Nadda) म्हणाले.

दक्षिण गोवा भाजप (BJP) जिल्हा कार्यालयात त्यानी प्रमुख कार्यकर्त्यांसमोर भाषण केले नाही, तर त्यांच्या समस्या, अडचणी, मतदारसंघाती परिस्थिती या संबंधी माहिती जाणून घेतली. तृणमूल (TMC) तसेच आप (AAP) पक्षांच्या गोव्यातील स्थितीचा त्यांनी आढावा घेतला व त्यांच्या प्रचाराला कसे उत्तर द्यावे, त्यासाठी काय करावे यासंबंधीचे मुद्दे त्यांनी मांडले. कार्यकर्त्यांनी निवडणुकीच्या वेळी संयम बाळगावा, मतदारांकडे अरेरावी भाषेचा वापर करु नये. त्यांच्या प्रश्र्नांची समर्पक उत्तरे द्यावी, असा सल्लाही त्यांनी यावेळी दिला. पक्षाच्या योजना, सरकारी योजनांची माहिती त्यांना देणे महत्वाचे असल्याचेही त्यांनी स्पष्ट केले.

मतदान ओळखपत्राकडे आधारकार्ड (Adhar Card) जोडण्यासाठी जो कायदा संमत केला आहे, तो दूरगामी परिणामाचा अभ्यास करुनच केला आहे. त्यामुळे एकाच माणसाची दोन तीन मतदान केंद्रामध्ये मतदार म्हणून नोंदणी आहे त्यांच्यावर अंकुश बसेल, अशी नावे असलेलेच या कायद्याला विरोध करतात असेही त्यानी स्पष्ट केले.

या कार्यकर्ता मार्गदर्शन मेळाव्याला मुख्यमंत्री डॉ. प्रमोद सावंत, केंद्रीय मंत्री श्रीपाद नाईक, राज्यसभा खासदार विनय तेंडुलकर, पक्षाचे राज्य अध्यक्ष सदानंद शेट तानावडे, संघटनमंत्री सतीश धोंड, सरचिटणीस नरेंद्र सावईकर, दामोदर (दामू) नाईक) आदी मंडळी उपस्थित होती.