पणजी: येत्या विधानसभा निवडणुकीसाठी (Goa Election 2022) भाजपने (BJP) जोरदार मोर्चेबांधणी सुरू केली आहे. राष्ट्रीय आणि प्रादेशिक पक्षाचे नेते आमदार आणि कार्यकर्त्यांना फोडून भाजपमध्ये प्रवेश देण्याला आता जोर आला आहे. 19 डिसेंबर (Goa Liberation Day) रोजी पंतप्रधान नरेंद्र मोदी (PM Narendra Modi) गोव्यात येत असून ते गोव्यात येण्यापूर्वी भाजपने सर्व प्रकारची राजकीय तयारी सुरू केली आहे. पंतप्रधान हे शासकीय घोषणांबरोबर राजकीय घोषणा करत निवडणुकीचे रणशिंग फुकणार आहेत. दुसरीकडे, विरोधी पक्षांचे मात्र अजूनही उमेदवार ठरत नाहीत. काँग्रेस (Congress) आणि इतर प्रादेशिक पक्षांना उमेदवार मिळू नयेत यासाठी भाजप प्रयत्नशील असून या पक्षांच्या संभाव्य उमेदवारांना भाजपात घेण्यासाठी मोर्चेबांधणी सुरू झाली आहे. सध्या काँग्रेसबरोबर गोवा फॉरवर्ड (Goa Forward) आणि मगो पक्षाचे संभाव्य उमेदवार आणि नेते भाजपमध्ये सामावून घेण्यात येत असून यासाठीच मंत्रिमंडळात फेरबदलाची शक्यता आहे.

गोवा मुक्तिदिनाचा मुहूर्त

19 डिसेंबर हा गोवा मुक्तीचा दिवस आहे. यंदा हीरकमहोत्सवी गोवा मुक्तिदिन असल्याने या समारंभाला पंतप्रधान नरेंद्र मोदी उपस्थित राहणार आहेत. या दिवशी ते विविध शासकीय कार्यक्रमांना उपस्थित राहणार असून याच दिवशी ते गोवा विधानसभेच्या निवडणुकीचे रणशिंग फुंकतील आणि मोठ्या घोषणा करतील अशी अपेक्षा आहे.

मुख्यमंत्र्यांचा गौप्यस्फोट

आमदार जयेश साळगावकर यांच्या भाजप प्रवेशावेळी मुख्यमंत्री डॉ. प्रमोद सावंत यांनी गौप्यस्फोट करत विविध पक्षातील आठ ते दहा राजकीय नेते काँग्रेस, भाजपच्या संपर्कात असल्याचे सांगत राज्याच्या राजकारणामध्ये गौप्यस्फोट केला. त्यामुळे ‘ते नेते' कोण अशी चर्चा सुरू आहे.

मगोशी युतीबाबत आग्रही

दाजी साळकर यांना भाजपात घेतल्यानंतर काल जयेश साळगावकर यांना प्रवेश देण्यात आला, तर येत्या चार दिवसात काँग्रेस, गोवा फॉरवर्ड आणि मगोचे नेते भाजपवासी होतील, अशी शक्यता आहे. यासाठी 6 डिसेंबर रोजी भाजपचे निवडणूक प्रभारी देवेंद्र फडणवीस, सी. टी. रवी गोव्यात येत आहेत. मगोशी युतीबाबत फडणवीस आग्रही आहेत.