डिचोली: डिचोलीत सर्वत्र सध्या धालांचा उत्साह सुरु असून, गावोगावी धालांचे मांड फुलू लागले आहेत. धालांच्या मांडावरती रात्रीही जागू लागल्या आहेत. धालोगीते फुगड्या आदी पारंपरीक लोकसंस्कृतीचे दर्शनही गावोगावी धालांच्या मांडांवर होत आहे.

डिचोलीतील बहूतेक भागात वैशिष्ट्यपूर्ण पद्धतीने धालोत्सव साजरा करण्यात येतो. काही भागात पाच तर काही भागात सात दिवस धालोत्सव परंपरेप्रमाणे साजरा करण्यात येतो. ''रंभा अवसर'' ही प्रथा कारापूर, धुमासेसह काही भागातील धालांच्या मांडांवरील आकर्षण आहे.

आजतागायत ही परंपराही चालू आहे. धालो हा एक पारंपरीक लोककला प्रकार. धालो म्हणजे महिलांचा आनंद द्विगुणित करणारा उत्सव. पौष महिना सुरु झाला, की सर्वत्र धालोत्सवाचे वेध लागतात. सध्या बहूतेक भागात धालांची धूम सुरु आहे. दरम्यान, मुळगाव आणि धुमासे येथील धालोत्सवाची परंपरेप्रमाणे मोठ्या उत्साहात सांगता झाली.

पाच दिवस उत्सव!

गावकरवाडा-डिचोली येथील श्री शांतादुर्गा रवळनाथ देवस्थानच्या धालोत्सवाला उत्साहात प्रारंभ झाला आहे. बुधवारी परंपरेप्रमाणे धालोत्सवाची सांगता होणार आहे. गावकरवाडा येथील धालोत्सव पाच दिवस साजरा करण्यात येतो. धालोत्सवात येणाऱ्या सोमवारी श्री शांतादुर्गा मंदिरातून निघणारी श्रींची पालखी धालांच्या मांडावर नेण्याची प्रथा आहे. बुधवारी ''मांड'' ठेवल्यानंतर धालोत्सवाची सांगता होणार आहे.