Paramjit Singh Panjwar: दहशतवादी आणि खलिस्तान कमांडो फोर्स (KCF) प्रमुख परमजीत सिंग पंजवार उर्फ ​​मलिक सरदार सिंग याची शनिवारी गोळ्या घालून हत्या करण्यात आली.

आज सकाळी दोन अज्ञात बंदूकधाऱ्यांनी पाकिस्तानातील लाहोरमधील जौहर टाऊनमध्ये ही हत्या केली. ही घटना जोहरमधील सनफ्लॉवर सोसायटीतील पंजवार याच्या घराजवळ सकाळी सहा वाजण्याच्या सुमारास घडली.

वृत्तानुसार, पंजवार सकाळी फिरायला जात असताना मोटारसायकलवरुन आलेल्या दोन अज्ञात व्यक्तींनी त्याच्यावर गोळीबार केला. गोळीबारात KCF प्रमुखांसोबत फिरणारा व्यक्तीही जखमी झाला असून त्याला उपचारासाठी रुग्णालयात दाखल करण्यात आले आहे.

दरम्यान, परमजीत सिंग पंजवार हा भारतातील (India) पंजाबमध्ये ड्रोनद्वारे ड्रोन आणि शस्त्रास्त्रांच्या तस्करीत सामील होता. तरनतारनजवळील पंजवार गावात परमजीतचा जन्म झाला होता.

परमजीतला कट्टरपंथी बनवण्यात त्याचा चुलत भाऊ लाभ सिंग याचा मोठा हात असल्याचे सांगितले जाते. पंजवार 1986 मध्ये KCF मध्ये रुजू झाला. यापूर्वी तो सोहल येथील मध्यवर्ती सहकारी बँकेत कार्यरत होता.

परमजीत सिंग पंजवारचा इतिहास

यापूर्वी, भारतीय सुरक्षा दलाने लाभ सिंगला ठार केले. त्यानंतर 1990 च्या दशकात पंजवारने केसीएफची कमान हाती घेतली आणि तो पाकिस्तानात पळून गेला.

पाकिस्तानने त्याला आश्रयही दिला. अशा प्रकारे शेजारील देशात आश्रय घेणाऱ्या मोस्ट वाँटेड दहशतवाद्यांच्या यादीत तो पहिल्या क्रमांकावर आला.

पंजवारने सीमेपलीकडून शस्त्रास्त्रे आणि हेरॉइनची तस्करी करुन भरपूर पैसा कमावला. यासह तो केसीएफ सक्रिय ठेवण्यात यशस्वी झाला. पाकिस्तान (Pakistan) सरकारने नकार देऊनही, पंजवारची पत्नी आणि मुले लाहोरहून जर्मनीला गेली.

KCF चा उद्देश काय आहे?

खलिस्तान कमांडो फोर्स (KCF) चे उद्दिष्ट सर्व फुटीरतावादी खलिस्तानी अतिरेकी गटांना एकत्र आणण्याचे आहे. KCF त्यांना एकत्र करुन 'शीख होमलँड' तयार करु इच्छित आहे. असे म्हटले जाते की, त्याच्या संस्थेमध्ये तीन-स्तरीय यंत्रणा काम करते.

यामध्ये पंथिक समितीचे सदस्य पहिल्या आणि दुसऱ्या स्तरावर आघाडीवर आहेत. तिसऱ्या स्तरामध्ये प्रामुख्याने ऑल इंडिया शीख स्टुडंट्स फेडरेशन (AISSF) च्या कॅडरचा समावेश होतो. हे ज्ञात आहे की, केसीएफ कॅनडा, यूके आणि पाकिस्तानमध्ये कार्यरत आहे.