Nigeria Crisis:

आफ्रिकेतील गरीब देश असलेल्या नायजेरियाला सध्या सर्व बाजूंनी संकटांचा सामना करावा लागत आहे. देशात गृहयुद्धासारखी परिस्थिती आहे. बोको-हराम आणि आयएससारखे अनेक सशस्त्र दहशतवादी गट दररोज हल्ले करत आहेत. देशातील आर्थिक संकटही शिगेला पोहोचले आहे. नायजेरियन सरकार आपल्या नागरिकांचे संरक्षण करण्यात असहाय्य दिसते. नुकतेच उत्तर नायजेरियात सामूहिक अपहरणाचे प्रकरण समोर आले आहे, ज्यामध्ये एका सशस्त्र हल्लेखोरांच्या गटाने सुमारे 100 गावकऱ्यांचे घरातून अपहरण केले आहे.

सुमारे 100 गावकऱ्यांचे अपहरण

वृत्तसंस्था एपीने दिलेल्या माहितीनुसार, गेल्या एका आठवड्यात सशस्त्र टोळ्यांनी दोन गावांवर हल्ले केले असून सुमारे 100 लोकांचे अपहरण केले आहे. काजुरुचे प्रतिनिधी उस्मान दल्लामी यांनी स्टिंगो वृत्तसंस्थेशी बोलताना सांगितले की, बंदुकधाऱ्यांनी शनिवारी आणि रविवारी कडुना राज्यातील काजुरु कॉन्सिल भागात 'डोगोन नोमा' समुदायावर हल्ला केला आणि समुदायातील 14 महिलांसह (Women) 87 लोकांना ताब्यात घेतले.

यापूर्वी 300 विद्यार्थ्यांचे अपहरण झाले होते

दरम्यान, कडुना राज्य हे तेच क्षेत्र आहे, जिथे यापूर्वी सुमारे 300 शाळकरी मुलांचे अपहरण झाले होते. नायजेरियातील सामूहिक हत्या आणि अपहरणांसाठी ओळखल्या जाणाऱ्या सशस्त्र टोळ्यांवरही या सामूहिक अपहरणाचा आरोप आहे. उस्मान दल्लामी यांनी स्टिंगो वृत्तसंस्थेला सांगितले की, येथे कुठेही सुरक्षा दलांची उपस्थिती नाही, एवढ्या मोठ्या प्रमाणात अपहरण होऊनही एकही सुरक्षा कर्मचारी येथे आलेला नाही. स्टिंगोने नायजेरियातील (Nigeria) दुर्गम भागात सुरक्षाव्यवस्था नसल्याबद्दल चिंता व्यक्त केली आहे.

सरकारची भूमिका काय आहे?

गेल्या वर्षी अपहरण झालेल्या मुलांच्या सुटकेसाठी खंडणीची मागणी करण्यात आली होती, ज्याला नायजेरियाचे राष्ट्राध्यक्ष बोला टिनुबू यांनी नकार दिला होता. ताज्या अपहरणावर टिनुबूच्या सरकारने अद्याप कोणतेही वक्तव्य दिलेले नाही. या मुलांचा अद्याप सुगावा लागलेला नाही. आत्तापर्यंत टिनबू सरकार देशाला आर्थिक आणि लष्करी संकटातून बाहेर काढण्यात अयशस्वी ठरले आहे.