विमानात अल्पवयीन मुलीशेजारी हस्तमैथुन केल्याप्रकरणी भारतीय-अमेरिकन डॉक्टरला अमेरिकेत अटक करण्यात आली आहे. फेडरल ब्युरो ऑफ इन्व्हेस्टिगेशन (एफबीआय) ने ही कारवाई केली.

युनायटेड स्टेट्स अॅटर्नी ऑफिसने प्रसिद्ध केलेल्या माहितीनुसार, गेल्या वर्षी मे महिन्यात होनोलुलूहून बोस्टनला जाणाऱ्या फ्लाइटमध्ये ही घटना घडली होती. मॅसॅच्युसेट्समधील डॉ. सुदिप्ता मोहंती असे गुरुवारी अटक करण्यात आलेल्या डॉक्टरचे नाव आहे. "युनायटेड स्टेट्सच्या विशेष विमान कार्यक्षेत्रात असभ्य आणि अश्लील कृत्ये केल्याचा आरोप त्याच्यावर ठेवण्यात आला आहे.

डॉ. मोहंती बोस्टनमधील बेथ इस्रायल डेकोनेस मेडिकल सेंटरमध्ये कार्यरत आहेत. मोहंती एका महिलेसोबत उड्डाण करत होते. विमानात ते एका 14 वर्षाच्या मुलीच्या शेजारी बसले होते. मुलगी तिच्या आजोबांसोबत प्रवास करत होती.

डॉ. मोहंती यांनी चेहरा झाकून घेतला होता तसेच, अंगावर शालसारखे पांघरून घेतले होते. दरम्यान, काही वेळानंतर डॉ. मोहंती अश्लील कृत्य करत असल्याचे मुलीच्या लक्षात आले.

बोस्टनमध्ये विमान उतरल्यानंतर मुलीने तिच्या कुटुंबीयांना घटनेची माहिती दिली. कुटुंबीयांनी पोलिसांना याबाबत माहिती दिली. न्यूयॉर्क पोस्टनुसार, डॉ. मोहंती यांनी तपासादरम्यान आरोप फेटाळले आहेत, "मला या घटनेची कोणतीही आठवण नाही" असे त्यांनी म्हटले आहे.