VIDEO: 15 चेंडूत 40 धावांची गरज... अन् शेवटचा चेंडू! आरसीबीचा पॉवर हिटर पास झाला की फेल? सोशल मीडियावर थरार व्हायरल

Jitesh Sharma Viral Video: आयपीएल 2026 च्या रणधुमाळीला सुरुवात होण्यापूर्वी रॉयल चॅलेंजर्स बंगळुरुचा (RCB) धडाकेबाज फलंदाज जितेश शर्मा एका वेगळ्याच रुपात पाहायला मिळाला. मैदानावरील चौफेर फटकेबाजीसाठी प्रसिद्ध असलेल्या जितेशने थेट रस्त्यावर उतरुन 'गल्ली क्रिकेट'चा आनंद लुटला. यावेळी त्याने स्वतःला 15 चेंडूत 40 धावा करण्याचे कठीण आव्हान दिले होते, जे त्याने शेवटच्या चेंडूवर षटकार खेचून अतिशय स्टायलिश पद्धतीने पूर्ण केले.

भररस्त्यात खेळल्या गेलेल्या या सामन्यात स्थानिक गोलंदाजांनी त्याला सिंथेटिक चेंडूंनी गोलंदाजी केली. जितेशने डावाची सुरुवात दोन उत्तुंग षटकारांनी केली, ज्यामुळे बघ्यांची मोठी गर्दी जमली. मधल्या काही चेंडूंवर त्याला फटके मारताना अडचण आली आणि काही चेंडू 'डॉट' ही गेले, तरीही त्याने आपला आक्रमक पवित्रा सोडला नाही. चौथ्या आणि सहाव्या चेंडूवर अनुक्रमे चौकार आणि षटकार ठोकत त्याने धावांचा वेग कायम ठेवला.

सामना शेवटच्या षटकात आला तेव्हा जितेशला विजयासाठी 6 चेंडूत 12 धावांची गरज होती. षटकातील पहिला चेंडू निर्धाव गेल्याने दडपण वाढले होते, मात्र दुसऱ्याच चेंडूवर त्याने चौकार ठोकून समीकरण 4 चेंडूत 8 धावा असे सोपे केले. त्यानंतर पुन्हा एक षटकार लगावत त्याने विजय खेचून आणला. कमालीची उत्सुकता ताणली गेलेली असताना पुढचे दोन चेंडू पुन्हा 'डॉट' गेले, मात्र जितेशने हार मानली नाही. शेवटच्या चेंडूवर दोन धावा हव्या असताना त्याने थेट प्रेक्षणीय षटकार खेचून आपले चॅलेंज पूर्ण केले.

विशेष म्हणजे, 2025 मध्ये आरसीबीने (RCB) 18 वर्षांनंतर पहिल्यांदाच आयपीएलचे विजेतेपद पटकावले आणि त्या विजयात जितेश शर्माचा मोलाचा वाटा होता. विशेषतः लखनऊ सुपर जायंट्सविरुद्धच्या 'करो या मरो'च्या सामन्यात त्याने केवळ 33 चेंडूत नाबाद 85 धावांची खेळी खेळून 227 धावांचे महाकाय लक्ष्य यशस्वीरीत्या पार करुन दिले होते. आता 28 मार्च रोजी चिन्नास्वामी स्टेडियमवर सनरायझर्स हैदराबादविरुद्ध होणाऱ्या पहिल्या सामन्यात जितेश पुन्हा एकदा आरसीबीच्या विजयाचा पाया रचण्यासाठी सज्ज झाला आहे.