Co-pilot confession over Gaza revenge: दुबईहून तेल अवीवला जाणारी फ्लाईदुबईची फ्लाईट क्रमांक FZ1073 हायजॅक करण्यामागे आणि इस्रायलमध्ये भीषण हल्ला घडवून आणण्यामागे गाझामध्ये झालेल्या विनाशाचा बदला घेण्याचा कट होता, असा खळबळजनक खुलासा समोर आला.

इस्रायली ऑनलाइन न्यूज पोर्टल 'माको'ने दिलेल्या वृत्तानुसार, या हल्ल्याचा प्रयत्न करणारा ओमानचा को-पायलट हमम अल-हम्मामी याने चौकशी करणाऱ्या अधिकाऱ्यांसमोर हा कबुलीजबाब दिला.

चौकशीदरम्यान हम्मामने अमीराती तपास अधिकाऱ्यांना सांगितले की, "मी गाझाचा बदला घेण्यासाठी हे कृत्य केले. मला शहीद व्हायचे होते." या धक्कादायक खुलाशाने एकच खळबळ उडाली.

तपासात असेही उघड झाले की, हमम अल-हम्मामी हा इस्लामिक कट्टरपंथी विचारधारा आणि विचारांनी पूर्णपणे प्रभावित झाला होता. सीएनएनच्या रिपोर्टनुसार, अल-हम्मामी याला याआधीच त्याच्या याच अतिरेकी विचारसरणीमुळे ओमानच्या (Oman) राष्ट्रीय विमान कंपनीतून बडतर्फ करण्यात आले होते. नंतर त्याच्या नावाशी संबंधित सोशल मीडिया अकाऊंट्सवरुन इस्रायली विमानांच्या कॉकपिटचे व्हिडिओ आणि अल-कायदाशी संबंधित व्यक्तींचे व्हिडिओ पोस्ट केल्याचे निदर्शनास आले.

या 30 सप्टेंबर रोजी घडलेल्या थरारक घटनेत फ्लाईदुबईच्या फ्लाईट 1073 मध्ये 170 हून अधिक प्रवासी प्रवास करत होते, ज्यामध्ये प्रामुख्याने इस्रायली नागरिक होते. विमान लँड होण्यास एक तास शिल्लक असताना, अल-हम्मामीने कॅप्टन स्मित मच्छार यांच्यावर अचानक जीवघेणा हल्ला केला.

या झटापटीत विमान काही सेकंदांतच तब्बल 17,000 फुटांपेक्षा खाली आले. परंतु, कॅप्टन मच्छार यांनी अत्यंत धैर्याने हल्ल्याचा मुकाबला करत कॉकपिटचे दार उघडले, ज्यामुळे इतर प्रवाशांना आणि ऑफ-ड्यूटी पायलटला आत येऊन परिस्थिती नियंत्रणात आणता आली.

प्रवाशांच्या आणि पायलटच्या या संयुक्त धाडसामुळे एक मोठा विमान अपघात आणि इस्रायलमध्ये घडणारा 9/11 सारखा महाभयंकर हल्ला थोडक्यात टळला. इस्रायली मीडियानुसार, अल-हम्मामीने याआधी जुलै महिन्यातही असाच कट रचण्याचा विचार केला होता, परंतु क्रू मेंबरचा मित्र असल्यामुळे त्याने तो प्लॅन ऐनवेळी टाळला होता. सध्या अधिकारी त्याच्या फोनची, परदेश दौऱ्यांची आणि संपर्कांची कसून चौकशी करत आहेत.