Israel-Hamas War: इस्रायल आणि हमास यांच्यात अनेक दिवसांपासून युद्ध सुरु आहे. आतापर्यंत दोन्ही बाजूंच्या 26 हजारांहून अधिक नागरिकांचा मृत्यू झाला आहे. दरम्यान, अमेरिकन अधिकारी युद्ध संपवण्याबरोबरच ओलिसांच्या सुटकेवर जास्त जोर देत आहेत. यावर इस्रायलचे म्हणणे आहे की, सर्व समस्यांवर हमासचा खात्मा हाच एकमेव उपाय आहे. पंतप्रधानांसह इस्रायलच्या उच्चस्तरीय अधिकाऱ्यांनी हमासचा खात्मा होईपर्यंत गप्प बसणार नाही, अशी शपथ अनेक वेळा घेतली आहे.

दरम्यान, इस्रायलचे पंतप्रधान बेंजामिन नेतन्याहू यांनी शनिवारी पत्रकार परिषद घेतली. यावेळी त्यांनी ॲडॉल्फ हिटलरच्या 'माइन काम्फ' या आत्मचरित्राची अरबी प्रत दाखवली. नेतन्याहू म्हणाले की, हे पुस्तक इस्रायली सैनिकांनी गाझामधील पॅलेस्टिनी नागरिकांच्या घरातून जप्त केले आहे. जेव्हा इस्रायल गाझामधील दहशतवाद्यांचा खात्मा करेल, तेव्हा सेमिटिक विरोधी विचारसरणीचाही अंत होईल. जर आपण नवीन नाझी म्हणजेच हमासच्या दहशतवाद्यांना संपवले नाही तर पुन्हा एकदा नरसंहार होऊ शकतो. गुप्तचर संस्थेचे संचालक विल्यम बर्न्स ओलिसांच्या सुटकेबाबत बोलण्यास तयार आहेत. नेतन्याहू म्हणाले की, मी माझ्या संरक्षण आणि अर्थ मंत्र्यांना अशी योजना बनवण्याच्या सूचना दिल्या आहेत, ज्यामुळे आपले संरक्षण क्षेत्र अधिक मजबूत होईल.

इस्रायलने सडकून टीका केली

नेतन्याहू यांनी एक दिवस आधी आलेल्या आंतरराष्ट्रीय न्यायालयाच्या निर्णयावरही सडकून टीका केली. आम्ही आमच्या नागरिकांच्या रक्षणासाठी कटिबद्ध आहोत, असे शुक्रवारी नेतन्याहू यांनी म्हटले होते. आपल्या लोकांच्या आणि देशाच्या सुरक्षेसाठी आवश्यक ती पावले उचलू. प्रत्येक देशाप्रमाणेच इस्रायललाही आपल्या अखंडतेचे रक्षण करण्याचा मूलभूत अधिकार आहे. इस्रायल पॅलेस्टिनींविरुद्ध नरसंहार करत असल्याचा दावा पूर्णपणे खोटा आहे. हे अपमानजनक आहे, असेही नेतन्याहू म्हणाले होते.

इस्रायलने जेरुसलेममधील अल-अक्सा मशिदीमध्ये केलेल्या अपवित्र कृत्याचा हा बदला असल्याचे हमासने म्हटले आहे. हमासने म्हटले होते की, इस्रायली पोलिसांनी एप्रिल 2023 मध्ये अल-अक्सा मशिदीवर ग्रेनेड फेकून अपवित्र कृत्य केले होते. दरम्यान, इस्रायलचे सैन्य हमासच्या ठाण्यांवर सातत्याने हल्ले करत असून अतिक्रमणही करत आहे. इस्रायली सैन्य आमच्या महिलांवर हल्ले करत आहे, असे हमासचे म्हणणे आहे. हमासचे प्रवक्ते गाझी हमद यांनी अरब देशांना इस्रायलशी असलेले सर्व संबंध तोडण्याचे आवाहन केले आहे. हमाद म्हणाले की, इस्रायल कधीही चांगला शेजारी आणि शांतताप्रिय देश असू शकत नाही.