जागतिक पातळीवर वाढत चाललेल्या युद्धजन्य परिस्थितीमुळे आधीच भीती आणि तणावाचे वातावरण निर्माण झाले आहे. अशातच दुबईत घडल्याचा दावा करण्यात येत असलेल्या एका घटनेने सर्वसामान्यांच्या सुरक्षेचा मुद्दा पुन्हा ऐरणीवर आणला आहे. सोशल मीडियावर वेगाने व्हायरल होत असलेल्या एका व्हिडिओमुळे नेटीझन्स हादरले असून, या घटनेबाबत विविध दावे-प्रतिदावे समोर येत आहेत.

व्हायरल क्लिपमध्ये एक महिला हॉटेलमधील खोलीत बसून लाईव्ह स्ट्रीम करताना दिसते. ती आपल्या प्रेक्षकांशी निवांत संवाद साधत असताना वातावरण पूर्णपणे शांत असल्याचे जाणवते. मात्र काही क्षणांतच परिस्थिती अचानक बदलते. मोठा स्फोट झाल्याचा आवाज येतो आणि कॅमेरा जोरात हलू लागतो.

त्यानंतर स्क्रीनवर धूर आणि गोंधळाचे दृश्य दिसून येते. सोशल मीडियावरील काही पोस्ट्समध्ये दावा करण्यात आला आहे की ज्या इमारतीत ती महिला उपस्थित होती, त्या परिसरात क्षेपणास्त्र कोसळले. स्फोटाची तीव्रता मोठी असल्याचे बोलले जात असून इमारतीचे मोठ्या प्रमाणात नुकसान झाल्याचा दावा काही युजर्सनी केला आहे.

इतकेच नव्हे तर संबंधित महिलेचा घटनास्थळी मृत्यू झाल्याचीही चर्चा सुरू आहे. मात्र या दाव्यांना अधिकृत दुजोरा मिळालेला नसल्याचेही काही जणांनी नमूद केले आहे. हा व्हिडिओ X (पूर्वीचे ट्विटर) या प्लॅटफॉर्मवर @Sheetal2242 या हँडलवरून शेअर करण्यात आला असल्याचे सांगितले जाते.

काही तासांतच लाखो व्ह्यूज आणि हजारो प्रतिक्रिया या पोस्टला मिळाल्या. युद्धाच्या पार्श्वभूमीवर निरपराध नागरिकांच्या जीवितास धोका निर्माण होत असल्याबद्दल अनेकांनी तीव्र संताप व्यक्त केला, तर काहींनी या घटनेची सत्यता तपासण्याची मागणी केली. एकूणच, या व्हायरल व्हिडिओने युद्धकाळातील सामान्य नागरिकांची सुरक्षितता आणि सोशल मीडियावर पसरत असलेल्या अप्रमाणित माहितीबाबत गंभीर प्रश्न उपस्थित केले आहेत.