अमेरिकेतील टेक्सास (Texas) राज्याच्या हद्दीत एका ट्रकमध्ये 42 जणांचा मृत्यू झाला आहे. हे सर्वजण परप्रांतीय असल्याचे माहिती मिळाली आहे. स्थानिक मीडिया रिपोर्ट्सनुसार, किमान 16 लोकांना गंभीर अवस्थेत रुग्णालयात दाखल करण्यात आले आहे.

सोशल मीडियावर (Social Media) शेअर होत असलेल्या फोटोंमध्ये अनेक आपत्कालीन कर्मचारी एका मोठ्या ट्रकभोवती दिसत आहेत. एका स्थानिक टीव्ही चॅनलनुसार, ट्रक सॅन अँटोनियोच्या नैऋत्य बाजूला रेल्वे ट्रॅकजवळ दिसला.

न्यूयॉर्क टाइम्सच्या मते, सॅन अँटोनियो पोलिस विभागाचे अधिकारी घटनास्थळावरून पळून गेलेल्या वाहन चालकाचा शोध घेत आहेत. सॅन अँटोनियो यूएस-मेक्सिको सीमेपासून सुमारे 250 किलोमीटर अंतरावर आहे. टेक्सासचे गव्हर्नर ग्रेग अॅबॉट यांनी या मृत्यूंसाठी राष्ट्राध्यक्ष जो बायडन (Joe Biden) यांना जबाबदार धरले आहे.

मेक्सिकोचे परराष्ट्र मंत्री मार्सेलो एब्रार्ड यांनी सांगितले की, त्यांचा एक अधिकारी घटनास्थळी रवाना झाला आहे. मात्र, पीडितांच्या नागरिकत्वाबाबत अद्याप कोणतीही माहिती नसल्याचे त्यांनी सांगितले. या लोकांचा मृत्यू कशामुळे झाला हे अद्याप समजू शकलेले नाही.