चीनने या आठवड्यात हिंदी महासागर क्षेत्रातील 19 देशांसोबत बैठक घेतली. विशेष म्हणजे या बैठकीत भारत अनुपस्थित होता. या बैठकीसाठी भारताला निमंत्रित करण्यात आले नसल्याची माहिती समोर आली आहे. 21 नोव्हेंबर रोजी झालेल्या चीन-हिंद महासागर क्षेत्रीय मंच विकास सहकार्याच्या बैठकीत 19 देश सहभागी झाले होते. असे चीनच्या परराष्ट्र मंत्रालयाशी संलग्न असलेल्या चायना इंटरनॅशनल डेव्हलपमेंट कोऑपरेशन एजन्सी (सीआयडीसीए) च्या निवेदनात म्हटले आहे.

ऑनलाइन पद्धतीने आयोजित करण्यात आलेल्या या बैठकित इंडोनेशिया, पाकिस्तान, म्यानमार, श्रीलंका, बांगलादेश, मालदीव, नेपाळ, अफगाणिस्तान, इराण, ओमान, दक्षिण आफ्रिका, केनिया, मोझांबिक, टांझानिया, सेशेल्स, मादागास्कर, मॉरिशस, जिबूती आणि ऑस्ट्रेलिया यासह 19 देश आणि तीन आंतरराष्ट्रीय संस्थांचे प्रतिनिधी सहभागी झाले होते. सागरी अर्थव्यवस्था त्याची तत्त्वे आणि पद्धती व सामायिक विकास अशी या बैठकीचा विषय होता.

हिंद महासागर क्षेत्रात चीन आपला प्रभाव वाढवण्यासाठी प्रयत्न करत आहे. यासाठी पाकिस्तान आणि श्रीलंकेसह (Pakistan And Srilanka) अनेक देशांच्या बंदरे आणि पायाभूत सुविधांमध्ये गुंतवणूक करत आहे. हिंद महासागर प्रदेशात भारताच्या प्रभावाविरोधात मजबूत व्यासपीठ तयार करणे चीनचे उद्दिष्ट आहे.