Pakistan Factory Blast: पूर्व पाकिस्तानमधील पंजाब प्रांतातील फैसलाबाद शहरात एका औद्योगिक प्रकल्पात मोठा आणि भीषण स्फोट झाला. येथील एका गोंद बनवण्याच्या फॅक्टरीत शुक्रवारी (21 नोव्हेंबर) सकाळी बॉयलरचा स्फोट झाल्यामुळे झालेल्या दुर्घटनेत कमीतकमी 15 मजुरांचा जागीच मृत्यू झाला तर सातहून अधिक मजूर जखमी झाले. या दुर्घटनेमुळे संपूर्ण परिसरात भीतीचे वातावरण पसरले. अग्निशमन दलासह पोलिसांनी तात्काळ घटनास्थळी धाव घेतली.
दरम्यान, या भीषण स्फोटानंतर फॅक्टरीचा मालक तातडीने घटनास्थळावरुन फरार झाला. पोलिसांनी तात्काळ कारवाई करत फॅक्टरीच्या व्यवस्थापकाला अटक केली, तर फरार मालकाचा शोध घेत आहेत. स्थानिक पोलीस अधिकारी मोहम्मद अस्लम यांनी दिलेल्या माहितीनुसार, या प्रकरणाची सखोल चौकशी सुरु आहे.
फैसलाबाद शहरात झालेल्या या औद्योगिक स्फोटाचे नेमके कारण अद्याप स्पष्ट झालेले नाही. स्थानिक प्रशासक राजा जहांगीर यांनी घटनेची माहिती देताना सांगितले की, बॉयलरचा स्फोट इतका तीव्र होता की, या स्फोटामुळे केवळ फॅक्टरीच्या इमारतीचेच नव्हे, तर आसपासच्या घरांचेही मोठ्या प्रमाणात नुकसान झाले. स्फोटानंतर फॅक्टरीमध्ये त्वरित मोठी आग लागली, ज्यामुळे जीवित व वित्तहानी वाढली. एवढ्या मोठ्या दुर्घटनेमुळे या औद्योगिक परिसरात भीती आणि चिंतेचे वातावरण पसरले.
पंजाब (Punjab) प्रांताच्या मुख्यमंत्री मरियम नवाज शरीफ यांनी या दुःखद घटनेबद्दल संवेदना व्यक्त केल्या. त्यांनी प्रशासकीय अधिकाऱ्यांना तातडीने कार्यवाही करण्याचे आदेश दिले. मुख्यमंत्री शरीफ यांनी अधिकाऱ्यांना जखमी मजुरांना तातडीने वैद्यकीय उपचार उपलब्ध करुन देण्याचे आदेश दिले. तसेच, या अपघातासाठी जबाबदार असलेल्यांवर कठोर कारवाई करण्याचेही निर्देश त्यांनी दिले.
मिळालेल्या माहितीनुसार, पाकिस्तानात औद्योगिक अपघात आणि फॅक्टरीतील आगीच्या घटना वारंवार घडतात, याचे एक मोठे कारण म्हणजे सुरक्षेचे अत्यंत खराब मानक. औद्योगिक क्षेत्रातील सुरक्षा नियमांचे पालन केले जात नसल्यामुळे असे मोठे अपघात घडत असल्याचे वारंवार दिसून आले आहे. अलीकडेच 2024 मध्ये फैसलाबाद येथील एका कापड गिरणीत अशाच प्रकारचा बॉयलर स्फोट झाला होता, ज्यात सुमारे एक डझन मजूर (Worker) जखमी झाले होते. गेल्या आठवड्यात कराची शहरात एका फटाका फॅक्टरीत झालेल्या स्फोटातही चार लोकांचा मृत्यू झाला.
या प्रकारच्या वारंवार घडणाऱ्या घटनांमुळे पाकिस्तानमधील औद्योगिक कामगारांच्या सुरक्षेचा प्रश्न गंभीर बनला असून, या गोंद फॅक्टरी स्फोटाच्या सखोल चौकशीनंतर सुरक्षेच्या मानकांवर लक्ष केंद्रित होण्याची शक्यता आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.