Pakistan Afghanistan Conflict: पाकिस्तान आणि अफगाणिस्तान यांच्यातील सीमावाद आता एका भीषण युद्धाच्या उंबरठ्यावर येऊन पोहोचला आहे. पाकिस्तानने अफगाणिस्तानच्या काबुल, कंधार आणि पक्तिया या प्रमुख शहरांवर केलेल्या एअरस्ट्राईकचा बदला घेण्यासाठी तालिबान सरकारने अत्यंत कडक लष्करी कारवाई केली. अफगाण सैन्याने केवळ सीमेवर गोळीबार केला नाही, तर चक्क पाकिस्तानी हद्दीत घुसून अनेक लष्करी चौक्यांवर ताबा मिळवला असून पाकिस्तानचे मोठे नुकसान केल्याचा दावा केला. या कारवाईमुळे ड्युरंड रेषेवर तणाव शिगेला पोहोचला असून दोन्ही देशांमधील संबंध कमालीचे बिघडले आहेत.

अफगाण संरक्षण मंत्रालयाच्या दाव्यानुसार, पाकिस्तानी सैन्य या हल्ल्यासाठी तयार नव्हते, ज्यामुळे 4 चौक्यांवरील सैनिक आपली शस्त्रे सोडून जीव वाचवण्यासाठी पळून गेले. ही कारवाई पाकिस्तानने (Pakistan) अफगाण सीमा ओलांडून केलेल्या हवाई हल्ल्याला आणि त्यामध्ये झालेल्या निरपराध नागरिकांच्या मृत्यूस दिलेले चोख उत्तर असल्याचे अफगाणिस्तानने म्हटले.

मिळालेल्या माहितीनुसार, 26 फेब्रुवारीच्या रात्री सुमारे 8 वाजण्याच्या सुमारास अफगाण सैन्याने पक्तिका, पक्तिया, खोस्त आणि नंगरहार यांसारख्या सीमावर्ती भागांतून पाकिस्तानवर एकाच वेळी हल्ला चढवला. अवघ्या 4 तास चाललेल्या या भीषण युद्धात अफगाण मुजाहिदीननी पाकिस्तानच्या 2 मोठ्या लष्करी तळांवर (गॅरीसन) आणि 19 सीमा चौक्यांवर पूर्णपणे ताबा मिळवला.

या रक्तरंजित संघर्षात पाकिस्तानचे 55 सैनिक मारले गेल्याचा दावा करण्यात आला आहे. विशेष म्हणजे, अफगाण सैन्य अनेक पाकिस्तानी सैनिकांचे मृतदेह आपल्यासोबत घेऊन गेले असून काही सैनिकांना जिवंत बंदी बनवल्याचेही वृत्त समोर येत आहे. या हल्ल्यादरम्यान अफगाण सैन्याने पाकिस्तानचा एक रणगाडा उद्ध्वस्त केला आणि मोठ्या प्रमाणात अत्याधुनिक शस्त्रे, दारुगोळा आणि एक लष्करी वाहने आपल्या ताब्यात घेतले.

हा संघर्ष इतका तीव्र होता की, पाकिस्तानच्या लष्करी तळांचे मोठे नुकसान झाले. अखेर रात्री 12 वाजता अफगाण लष्कराच्या 'चीफ ऑफ स्टाफ'च्या आदेशानंतर ही कारवाई थांबवण्यात आली. पाकिस्तानच्या एअरस्ट्राईकचा असा भीषण बदला घेतला जाईल याची कल्पना पाकिस्तानी लष्कराला नव्हती, ज्यामुळे आता संपूर्ण सीमेवर हाय अलर्ट जारी करण्यात आला आहे.