Bareilly Storm Viral Video: उत्तर प्रदेशातील बरेली जिल्ह्यात बुधवारी (13 मे) निसर्गाच्या कोपाचे एक अत्यंत भयावह दृश्य पाहायला मिळाले. गेल्या काही दिवसांपासून दिल्ली, उत्तर प्रदेश आणि इतर अनेक राज्यांमध्ये वादळी पावसाने मोठे नुकसान केले. ताशी 70 किलोमीटर वेगाने आलेल्या या वादळाने उत्तर प्रदेशातील विविध जिल्ह्यांत 50 हून अधिक लोकांचा बळी घेतला असून, शेकडो झाडे आणि वीजेचे खांब उन्मळून पडले आहेत. या सर्व घटनांमध्ये बरेलीच्या भमोरा क्षेत्रातील बबियाना गावात घडलेली एक घटना सध्या सर्वांचे लक्ष वेधून घेत आहे, जिथे एक व्यक्ती टिनशेडसह चक्क हवेत उडताना दिसली.

मिळालेल्या माहितीनुसार, 13 मे रोजी दुपारी भमोरा परिसरात अचानक जोरदार वादळ सुरु झाले. गावातील एका मंगल कार्यालयाचे टिनशेड वाऱ्याच्या वेगवान झोक्यांमुळे उडू लागले. हे टिनशेड वाचवण्यासाठी 50 वर्षीय नन्हें अन्सारी यांनी त्याला बांधलेली दोरी घट्ट पकडून ठेवली होती. मात्र, वाऱ्याचा वेग इतका प्रचंड होता की नन्हें अन्सारी टिनशेडसह हवेत फेकले गेले. ते सुमारे 50 ते 80 फूट अंतरापर्यंत हवेत उडाले आणि शेजारच्या शेतात जावून कोसळले. या थरारक अपघातात सुदैवाने अन्सारी यांचा जीव वाचला असला, तरी त्यांचा एक हात फ्रॅक्चर झाला. या संपूर्ण घटनेचा व्हिडिओ सोशल मीडियावर (Social Media) प्रचंड व्हायरल झाला असून तो पाहून कोणाच्याही अंगावर काटा येईल, अशी स्थिती आहे.

स्वतः अन्सारी यांनी या अनुभवाबद्दल सांगितले की, त्यांना वादळाच्या तीव्रतेचा अजिबात अंदाज आला नव्हता. वाऱ्याने त्यांना इतक्या उंचावर उचलले होते की डोळ्यासमोर सर्व काही धुसर झाले होते. जेव्हा हातातील दोरी निसटली, तेव्हा ते थेट जमिनीवर कोसळले. अन्सारी जमिनीवर पडताच स्थानिक गावकऱ्यांनी त्यांचा शोध घेऊन त्यांना तातडीने रुग्णालयात दाखल केले.

वादळाचे हे संकट केवळ मालमत्तेपुरते मर्यादित राहिले नाही. भमोरा क्षेत्रातीलच हर्रामपुर गावात एका निष्पाप बालिकेचा मृत्यू झाला. सातवीत शिकणारी देवकी सक्सेना ही मुलगी दुपारी 12 च्या सुमारास बागेत गेली होती. वादळ सुरु झाल्यावर स्वतःचा बचाव करण्यासाठी ती एका आंब्याच्या झाडाखाली उभी राहिली. दुर्दैवाने, वाऱ्याच्या जोराने तेच झाड देवकीच्या अंगावर कोसळले, ज्यामध्ये तिचा जागीच मृत्यू झाला. बरेलीतील या दोन टोकाच्या घटना वादळाच्या भीषण वास्तवाची जाणीव करुन देत आहेत.