Gurugram News: गोव्याला देशभरातून पर्यटक येत असतात. प्रत्येकाची गोव्याला येण्याची कारणे वेगवेगळी असतात. असेच तीन मित्र गोव्याला आले. हौसेने ते गोव्यातील कॅसिनोमध्ये गेले. तिथे त्यांना एक कल्पना सुचली आणि त्याच कल्पनेमुळे अखेर ते तुरूंगात पोहचल्याचे समोर आले आहे.

गोव्यात येऊन या तिन्ही मित्रांनी कॅसिनोत जाऊन जुगार कसा खेळायचा ते शिकून घेतला. त्यानंतर ते परत गुरूग्रामला परतले. तिथे जाऊन त्यांनी चक्क कॅसिनोच सुरू केला. या कॅसिनोत लोकांना मद्यासह जुगार खेळण्याचे विविध गेम्स सुरू केले.

पण, सिकिंदरपूर पोलिसांना या अवैधरित्या सुरू असलेल्या कॅसिनोची माहिती मिळाली. आणि त्यानंतर पोलिसांच्या पथकाने या कॅसिनोवर धाड टाकली. त्यातून या कॅसिनोचा भांडाफोड झाला आहे. पोलिसांनी या अवैध कॅसिनोच्या 3 संचालकांसह 40 ग्राहकांना ताब्यात घेतले आहे.

पैकी तीन संचालक म्हणजेच तेच तिन मित्र आहेत, ज्यांनी गोव्यात येऊन कॅसिनोत पाहून जुगार शिकला होता. घटनास्थळावरून पोलिसांनी महागड्या दारूच्या 25 बाटल्या, बीअर, 2511 टोकन, जुगासाठीच्या पत्त्यांचे 12 सेट, कॅसिनो टेबल अशा साहित्यासह 2 लाख 10 हजार रूपये रोकड जप्त केली आहे.

या भागात रात्री गस्त घालत असताना सिकंदरपूरचे प्रभारी पोलिस निरीक्षक सतेंद्र कुमार यांना सकतपूर येथील अरण्या ग्रीन फार्म हाऊसजवळ अवैधरित्या कॅसिनो सुरू असल्याची माहिती मिळाली होती.

सतेंद्रकुमार यांच्या पथकाने तिथे छापा टाकला. तेव्हा तिथे जुगार आणि मद्यपान सुरू होते. पोलिसांनी तीन 3 मुख्य संशयितांसह 40 ग्राहकांना रंगेहाथ पकडले.

कृष्ण कुमार (वय 54, रा. ज्योती पार्क), सुरेंद्र कुमार (57, रा. रामनगर) आणि मनिष अशी हा कॅसिनो चालवणाऱ्यांची नावे आहेत. त्यांच्याकडे चौकशी केल्यावर त्यांनी सांगितले की, ते तिघेही जेव्हा गोव्याला फिरायला जायचे, तेव्हा तिथे त्यांनी कॅसिनो पाहिले होते. कॅसिनोत जाऊन आपल्या येथेही कॅसिनो सुरू करावा, असे त्यांना वाटले.

त्यासाठी तिघांनीही जुगार शिकून घेतला. त्याचे विविध प्रकार, गेम्स शिकून घेतले. तशा पद्धतीने त्यांनी कॅसिनो थाटण्याचा प्रयत्न केला. पण त्यांचा हा प्रयत्न पोलिसांनी हाणून पाडला आहे. पोलिस या प्रकरणाचा अधिक तपास करत आहेत.