Kedarnath Yatra: हवामान विभागाने मुसळधार पावसाचा इशारा दिल्याने केदारनाथ यात्रा तात्पुरती थांबवावी लागली आहे. ही माहिती देताना पोलिसांनी सांगितले की, भाविकांना मंदिरात न जाण्याचा आणि हॉटेलमध्ये परतण्याचा सल्ला देण्यात आला आहे.

रुद्रप्रयागचे सर्कल ऑफिसर प्रमोद कुमार म्हणाले, "सोमवारी सकाळपासून ऑरेंज अलर्ट आणि पावसामुळे आम्ही पादचाऱ्यांना थांबवून हॉटेलमध्ये परत जाण्याची विनंती केली आहे. भाविकांना सध्या मंदिरात न जाण्यास सांगण्यात आले आहे. सुरक्षित रहा."

विशेष म्हणजे, गंगोत्री आणि यमुनोत्री धामांचे दरवाजे उघडल्यानंतर या महिन्यात चारधाम यात्रा सुरु झाली आहे. केदारनाथचे (Kedarnath) दरवाजे 6 मे रोजी तर बद्रीनाथचे दरवाजे 8 मे रोजी उघडण्यात आले होते. केदारनाथ धामचे दरवाजे उघडण्यापूर्वी, उत्तराखंडचे (Uttarakhand) मुख्यमंत्री पुष्कर सिंह धामी एप्रिलच्या शेवटी मंदिर परिसरात पोहोचले आणि त्यांनी चालू असलेल्या बांधकाम कामांचा आणि आगामी प्रवासाशी संबंधित तयारीचा आढावा घेतला. मुख्यमंत्र्यांनी रुद्रप्रयाग जिल्ह्यातील केदारनाथ धाममध्ये पूर्ण झालेल्या सरस्वती आस्था पथाची पाहणी केली होती.