Gujarat Assembly Elections: पंतप्रधान नरेंद्र मोदी रविवारी गुजरात दौऱ्यावर जाणार आहेत. गुजरातमध्ये निवडणुका जाहीर झाल्यानंतर त्यांचा हा पहिलाच दौरा असेल. कार्यक्रमातर्गंत पंतप्रधान मोदी भावनगर, सुरेंद्रनगर आणि वलसाड इथे जाणार असून, ते इथे निवडणूक रॅलींना संबोधित करणार आहेत.

विशेष म्हणजे, निवडणूक आयोगाने (Election Commission) गुरुवारी गुजरात विधानसभा निवडणुकीच्या तारखा जाहीर केल्या. 182 जागांच्या गुजरात विधानसभेच्या निवडणुका दोन टप्प्यात होणार आहेत. पहिल्या टप्प्यात 1 डिसेंबरला तर दुसऱ्या टप्प्यात 5 डिसेंबरला मतदान होणार आहे. त्याचवेळी हिमाचल प्रदेश (Himachal Pradesh) विधानसभा निवडणुकीच्या निकालासोबत 8 डिसेंबरला निकाल जाहीर होणार आहेत. पहिल्या टप्प्यात 89 जागांवर तर दुसऱ्या टप्प्यात 93 जागांवर मतदान होणार आहे.

तसेच, गुजरातमध्ये होणाऱ्या विधानसभा निवडणुका दोन दशकांहून अधिक काळ राज्यात सत्तेवर असलेल्या भाजपसाठी आव्हानात्मक ठरु शकतात. यावेळच्या निवडणुकीत काँग्रेसशिवाय आम आदमी पक्षाकडून (आप) चुरशीची लढत होण्याची शक्यता आहे.

विशेष म्हणजे, गुजरातच्या (Gujarat) 14 व्या विधानसभेसाठी 2017 मध्ये झालेल्या निवडणुकीत भाजपने 99 जागा जिंकल्या होत्या. तर 1995 पासून सत्तेत असलेल्या पक्षाला नवीन सरकार बनवण्यात कोणतीही अडचण आली नाही. त्यावेळी प्रमुख विरोधी पक्ष काँग्रेसनेही राज्यात 77 जागा जिंकल्या होत्या. तर सहा जागा इतरांच्या खात्यात गेल्या होत्या.

दुसरीकडे, आजच्या घडीला गुजरात विधानसभेत भाजपचे 111 आमदार आहेत, तर काँग्रेस आमदारांची संख्या 62 आहे. दोन जागा BTP आमदारांच्या ताब्यात आहेत, आणि एक जागा राष्ट्रवादी काँग्रेस पक्षाच्या (NCP) आणि एक जागा अपक्ष आमदाराच्या ताब्यात आहे. राज्यात विधानसभेच्या पाच जागा रिक्त आहेत.