तेलंगणातील टीआरएस सरकारवर पंतप्रधान नरेंद्र मोदी यांनी गुरुवारी निशाणा साधला. मोदी म्हणाले की, ''जेव्हा एका कुटुंबाला समर्पित असणारा पक्ष सत्तेवर येतो, तेव्हा त्या कुटुंबातील सदस्य भ्रष्टाचाराचा सर्वात मोठा चेहरा बनतात.''

दरम्यान, राज्यातील एका जाहीर सभेला संबोधित करताना पीएम मोदी (Prime Minister Narendra Modi) पुढे म्हणाले, "राजकीय घराणेशाहीमुळे देशातील तरुणांना राजकारणात येण्याची संधीही मिळत नाही. अशा तरुणांच्या स्वप्नाचा चुराडा करुन त्यांना राजकारणात येण्यापासून रोखले जाते. घराणेशाहीपासून स्वातंत्र्य हा 21 व्या शतकातील भारताचा (India) संकल्प आहे."

कौटुंबिक पक्ष केवळ स्वत: ला समृद्ध करतात

मोदी पुढे म्हणाले, "तेलंगणातील (Telangana) लोक हे पाहत आहेत की, जेव्हा एका कुटुंबाला समर्पित असणारा पक्ष सत्तेवर येतो, तेव्हा त्या कुटुंबातील सदस्य भ्रष्टाचाराचा (Corruption) सर्वात मोठा चेहरा बनतात. तेलंगणातील लोक हे ही पाहत आहेत की, कुटुंबातील सदस्य स्वत:ची भरभराट करतात. आणि तिजोरी भरतात."

पंतप्रधानांनी पुढे अधोरेखित केले की, जेव्हा राजकीय घराणेशाही संपुष्ठात येईल, तेव्हा विकासाचे मार्ग खुले होतील. ते पुढे म्हणाले, "आता ही मोहीम पुढे नेण्याची जबाबदारी माझ्या तेलंगणातील बंधू-भगिनींची आहे."

सत्तेत अनेक कुटुंबीय

केटी रामाराव, तेलंगणाचे मुख्यमंत्री कलवकुंतला चंद्रशेखर राव यांचे पुत्र, सिरिल्ला येथील आमदार आहेत. त्याचबरोबर ते नगरपालिका प्रशासन आणि शहर विकास मंत्री आहेत. त्याच वेळी, केसीआर यांची मुलगी कविता यांनी निजामाबादमधून खासदार म्हणून काम केले आहे. सध्या 2020 पासून विधान परिषद, निझामाबादच्या सदस्या म्हणून काम करत आहे. तर केसीआर यांचे पुतणे हरीश राव हे सिद्धीपेटचे आमदार असून तेलंगणाचे अर्थमंत्री आहेत.