Naba Das Death: ओडिशाचे आरोग्य मंत्री नबा किशोर दास यांच्यावर आज, रविवारी दुपारी जीवघेणा हल्ला झाला होता. एका कार्यक्रमाला गेलेले असताना गाडीतून उतरल्यावर त्यांच्यावर एका पोलीस कर्मचाऱ्याने गोळीबार केला होता.

दास यांना गंभीर अवस्थेत रुग्णालयात दाखल करण्यात आले होते. त्यानंतर त्यांना भुवनेश्वरला हलविण्यात आले होते, पण उपचार सुरू असताना त्यांची प्राणज्योत मालवली.

मुख्यमंत्री नवीन पटनायक म्हणाले, "मंत्री नबा दास यांच्या अत्यंत दुर्दैवी निधनाने मला धक्का बसला आहे. त्याचा जीव वाचवण्यासाठी डॉक्टरांनी शक्य ते सर्व प्रयत्न केले. नबा दास सरकार आणि पक्षासाठी एक संपत्ती होते.

लोकांच्या हितासाठी त्यांनी आरोग्य विभागात अनेक उपक्रम यशस्वीपणे राबवले. एक नेता म्हणून नबा दास यांनी बिजू जनता दलाला मजबूत करण्यात महत्त्वाची भूमिका बजावली होती.

ओडिशातील झारसुगुडा जिल्ह्यातील बृजराजनगरजवळ हा हल्ला झाला. येथील गांधी चौकाजवळ पोलिस कर्मचाऱ्याने दास यांच्यावर गोळ्या झाडल्या.

दास यांच्यावर गोळीबार करणाऱ्या पोलीस कर्मचाऱ्याचे नाव गोपाल दास असे असून तो गांधी चौकात ASI म्हणून तैनात होता. गोपाल याने रिव्हॉल्व्हरमधून दास यांच्यावर 4 ते 5 राउंड फायर केले. गोपाल याला ताब्यात घेतले असून त्याची चौकशी सुरू आहे.

नबा किशोर दास हे बिजू जनता दलाचे ज्येष्ठ नेते आहेत. ते ओडिशातील झारसुखडा जिल्ह्यातील महत्वाचे नेते आहेत. ते आधी काँग्रेसमध्ये होते, नंतर त्यांनी बिजू जनता दलात प्रवेश केला. मुख्यमंत्री नवीन पटनायक यांच्या सरकारमध्ये ते आरोग्य मंत्री होते.

महाराष्ट्रातील शनि शिंगणापूर येथील मंदिराला एक कोटी रुपयांपेक्षा जास्त किमतीचा सोन्याचा कलश त्यांनी दान दिला होता. हा कलश 1.7 किलो सोन्याचा आहे. शिवाय 5 किलो चांदीचा कलशही त्यांनी दान दिला होता.