India vs Australia T20I Series: भारत आणि ऑस्ट्रेलिया यांच्यातील वनडे मालिका संपल्यानंतर आता 5 सामन्यांच्या टी20 आंतरराष्ट्रीय मालिकेचा आज (29 ऑक्टोबर) पासून श्रीगणेशा झाला. मालिकेतील पहिला सामना कॅनबेरामध्ये खेळला जात आहे, परंतु सामन्याच्या सुरुवातीपूर्वीच टीम इंडियाला मोठा धक्का बसला. भारताचा स्टार खेळाडू नितीश कुमार रेड्डी हा या मालिकेतील पहिले तीन सामने खेळू शकणार नाही, अशी माहिती समोर आली.

सूर्यकुमार यादवच्या टीमला धक्का

सूर्यकुमार यादवच्या (Suryakumar Yadav) नेतृत्वाखाली टीम इंडिया ऑस्ट्रेलियाविरुद्ध टी20 आंतरराष्ट्रीय मालिकेतील पहिला सामना खेळत आहे. पहिल्या सामन्यात ऑस्ट्रेलियाचा कर्णधार मिचेल मार्शने नाणेफेक जिंकून प्रथम गोलंदाजी करण्याचा निर्णय घेतला. म्हणजेच, आता भारताला प्रथम फलंदाजी करावी लागणार आहे. नाणेफेकनंतर कर्णधार 'सूर्या'ने भारताच्या प्लेइंग इलेव्हनबद्दल माहिती दिली, तेव्हा त्यात नितीश कुमार रेड्डीचे नाव नव्हते. यावर अधिक चर्चा होण्याआधीच, बीसीसीआयने (BCCI) अधिकृत माहिती देत स्पष्ट केले की, नितीश कुमार रेड्डी हे पहिले तीन टी20 सामने खेळू शकणार नाही.

दुखापतीमुळे रेड्डी बाहेर

बीसीसीआयने (BCCI) दिलेल्या माहितीनुसार, नितीश कुमार रेड्डीला दुखापत झाली आहे. ॲडलेडमध्ये झालेल्या दुसऱ्या वनडे सामन्यादरम्यान त्याला डाव्या क्वाड्रीसेप्समध्ये (Left Quadriceps) दुखापत झाली होती. या दुखापतीतून तो सावरत असतानाच, आता त्याला मानेमध्ये कडकपणा (Neck Spasm) जाणवत असल्याची तक्रार त्याने केली. यामुळे त्याच्या दुखापतीतून बरे होण्याच्या प्रक्रियेवर आणि हालचालींवर परिणाम झाला आहे.

बीसीसीआयने सांगितले की, वैद्यकीय पथक (Medical Team) त्याच्यावर लक्ष ठेवून आहे. तो पुढील दोन सामन्यांमध्ये खेळू शकेल की नाही, हे मेडिकल रिपोर्टनंतरच स्पष्ट होईल.

भारताची प्लेइंग XI: अभिषेक शर्मा, शुभमन गिल, सूर्यकुमार यादव (कर्णधार), तिलक वर्मा, संजू सॅमसन (यष्टीरक्षक), शिवम दुबे, अक्षर पटेल, हर्षित राणा, कुलदीप यादव, वरुण चक्रवर्ती, जसप्रीत बुमराह.