पणजी: मध्य पूर्वेतील इस्रायल, अमेरिका आणि इराण यांच्यातील वाढत्या संघर्षाचे पडसाद आता थेट सामान्य गोमंतकीयांच्या स्वयंपाकघरात उमटू लागले आहेत. जागतिक बाजारपेठेत कच्च्या तेलाच्या किमतीत झालेल्या चढ-उतारामुळे पेट्रोलियम कंपन्यांनी गॅस दरांचे पुनरावलोकन केले असून, गोव्यातील घरगुती एलपीजी सिलिंडरच्या दरात तब्बल ६० रुपयांची वाढ करण्यात आली आहे.
गेल्या अनेक महिन्यांपासून स्थिर असलेल्या गॅसच्या किमतींनी आता उचल घेतली आहे. गोव्यात १४.२ किलोग्रॅमच्या घरगुती सिलिंडरसाठी आता ग्राहकांना ८६७ रुपयांऐवजी ९२७ रुपये मोजावे लागणार आहेत.
सणासुदीचे दिवस आणि वाढती महागाई पाहता, ६० रुपयांची ही वाढ गृहिणींच्या घरगुती बजेटवर मोठा ताण निर्माण करणारी ठरणार आहे. विशेष म्हणजे ही दरवाढ आजपासूनच लागू करण्यात आली असल्याचे स्थानिक वितरकांनी स्पष्ट केले आहे.
केवळ घरगुतीच नव्हे, तर व्यावसायिक वापराच्या सिलिंडरनेही महागाईचा उच्चांक गाठला आहे. व्यावसायिक सिलिंडरच्या दरात ११५ रुपयांची मोठी वाढ करण्यात आली आहे. हॉटेल व्यावसायिक आणि केटरिंग सेवा देणाऱ्यांसाठी हा मोठा धक्का मानला जात आहे. यामुळे बाहेरचे जेवण आणि खाद्यपदार्थांच्या किमतीही वाढण्याची शक्यता वर्तवण्यात येत आहे.
इराण आणि इस्रायलमधील युद्धासदृश परिस्थितीमुळे आंतरराष्ट्रीय स्तरावर कच्च्या तेलाचा पुरवठा विस्कळीत होण्याची भीती निर्माण झाली आहे. या अनिश्चिततेमुळे जागतिक बाजारात कच्च्या तेलाचे दर वधारले आहेत. पेट्रोलियम कंपन्यांनी याच जागतिक बदलांचे कारण देत किमतींचे समायोजन केले आहे. केवळ गोवाच नव्हे, तर मुंबई, पुणे आणि दिल्लीसारख्या महानगरांमध्येही गॅस दरवाढीचा असाच फटका बसला आहे.
अचानक झालेल्या या दरवाढीमुळे सर्वसामान्यांमध्ये चिंतेचे वातावरण आहे. "आधीच जीवनावश्यक वस्तूंचे भाव गगनाला भिडले आहेत, त्यात आता गॅस महागल्यामुळे संसाराचे गणित जुळवणे कठीण झाले आहे," अशा प्रतिक्रिया गृहिणींकडून उमटत आहेत.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.