उत्तराखंड: नैनितालमध्ये एका अल्पवयीन मुलीवर झालेल्या कथित बलात्कारावरून धार्मिक तणाव निर्माण झाला. संतप्त नागरिकांनी तीव्र निषेध नोंदवत तोडफोड केली. पोलिस अधिकाऱ्यांनी दिलेल्या माहितीनुसार, व्यवसायाने कंत्राटदार असलेला संशयित आरोपी उस्मान, याला अटक करण्यात आली आहे.

पोलिसांनी दिलेल्या माहितीनुसार, परिसरात शांतता ठेवण्यासाठी मोठा पोलिस बंदोबस्त तैनात करण्यात आला आहे. बुधवारी रात्री ८ वाजता मुलीवर लैंगिक अत्याचार झाल्याचा आरोप करण्यात आला. पीडित मुलीला वैद्यकीय तपासणीसाठी घेऊन जात असल्याची बातमी पसरताच सर्वत्र निदर्शने सुरू झाली. काही हिंदू संघटनांच्या सदस्यांनी पोलिस ठाण्याबाहेर निदर्शने करत आरोपींवर कठोर कारवाई करण्याची मागणी केली.

एका विशिष्ट समुदायाच्या काही दुकानांना लक्ष्य करून तोडफोड करण्यात आली तर धार्मिक स्थळावर दगडफेक करण्यात आली. पाकिस्तानविरुद्ध घोषणाबाजी करणाऱ्या जमावाने वाहनांचे नुकसान केले आणि परिसरातील काही घरांवर दगडफेक केली, ज्यामुळे त्यांच्या खिडक्यांच्या काचा फुटल्याची माहिती समोर आली आहे.

या प्रकरणात नैनीताल शहराचे पोलिस अधीक्षक जगदीश चंद्रा आणि इतर वरिष्ठ अधिकाऱ्यांनी घटनास्थळी पोहोचून आरोपींवर कठोर कारवाईचे आश्वासन देऊन संतप्त लोकांना शांत करण्याचा प्रयत्न केला. मध्यरात्रीनंतरही निदर्शने सुरूच राहिल्याने, तणाव वाढू नये म्हणून पोलिसांनी पहाटे २ वाजेपर्यंत गस्त सुरुच ठेवण्यात आली होती.

शांतता राखण्यासाठी शहरात मोठ्या प्रमाणात पोलिस बंदोबस्त तैनात करण्यात आला आहे आणि लोकांना शांत राहण्याचे आवाहन पोलिसांकडून करण्यात आले आहे.