SBI Bank Robbed In Karnataka: कर्नाटकातील विजयपुरा जिल्ह्यात एक धक्कादायक घटना समोर आली आहे. तीन मुखवटे घातलेल्या दरोडेखोरांनी भारतीय स्टेट बँक (SBI) च्या शाखेवर मोठा दरोडा टाकला. दरोडेखोरांनी पिस्तूल आणि चाकूच्या धाकाने बँक कर्मचाऱ्यांना ओलीस ठेवले आणि एक कोटी रुपयांची रोकड तसेच कोट्यवधी रुपयांचे 20 किलो सोने-दागिने लुटले. या घटनेमुळे संपूर्ण राज्यात खळबळ उडाली.

दरम्यान, ही घटना विजयपुरा जिल्ह्यातील चडचन येथील एसबीआय शाखेत मंगळवारी संध्याकाळी सुमारे 6.30 वाजता घडली. दरोडेखोरांनी बँकेत प्रवेश केला आणि कर्मचाऱ्यांना धमकावून सर्व रोकड आणि दागिने घेऊन पळ काढला. दरोडेखोर निघून गेल्यानंतर बँक कर्मचाऱ्यांनी पोलिसांना तात्काळ घटनेची माहिती दिली. माहिती मिळताच पोलीस पथक घटनास्थळी पोहोचले आणि त्यांनी तातडीने तपास सुरु केला.

बँक अधिकाऱ्यांनी दिलेल्या माहितीनुसार, या दरोड्यात एकूण 21 कोटी रुपयांपेक्षा अधिक किंमतीचा मुद्देमाल लुटण्यात आला. यामध्ये एक कोटी रुपयांची रोकड आणि कोट्यवधी रुपयांचे 20 किलो सोन्याचे दागिने समाविष्ट आहेत. बँकेसारख्या सुरक्षित ठिकाणी इतक्या मोठ्या प्रमाणावर दरोडा टाकल्यामुळे पोलिसांसमोर एक मोठे आव्हान उभे राहिले आहे.

विजयपुराचे पोलीस अधीक्षक लक्ष्मण निंबार्गी यांनी सांगितले की, "दरोड्याच्या तपासादरम्यान आम्हाला असे आढळून आले की, आरोपींनी चोरीसाठी वापरलेल्या गाडीवर बनावट नंबर प्लेट लावली होती. गुन्हा केल्यानंतर आरोपी महाराष्ट्रातील पंढरपूरच्या दिशेने पसार झाले आहेत." पोलीस आता सीसीटीव्ही फुटेज आणि इतर तांत्रिक बाबींच्या आधारे आरोपींचा शोध घेत आहेत.

दरम्यान, या घटनेची गंभीर दखल कर्नाटकचे मुख्यमंत्री सिद्धरमैया यांनी घेतली आहे. त्यांनी विजयपुराचे पोलीस अधीक्षक लक्ष्मण निंबार्गी यांना निर्देश दिले की, असे गुन्हे रोखण्यासाठी कठोर पावले उचलावीत आणि आरोपींवर कडक कारवाई करावी. मुख्यमंत्र्यांनी सांगितले की, "गुन्ह्यात वापरलेली गाडी ओळखली गेली आहे. मी विजयपुराच्या एसपींशी बोललो असून त्यांना आरोपींना लवकरच अटक करण्याचे निर्देश दिले आहेत. सर्व अधिकाऱ्यांना सतर्क राहण्याचे आणि भविष्यात अशा घटना पुन्हा घडू नयेत यासाठी ठोस उपाययोजना करण्याचे निर्देशही देण्यात आले आहेत."

तसेच, या प्रकारच्या गुन्ह्यांमध्ये इतर राज्यांतील गुन्हेगारांचा सहभाग आणि वाढत्या दरोड्यांविषयी विचारले असता मुख्यमंत्री सिद्धरमैया यांनी सांगितले की, "मी पोलिसांना आवश्यक ती खबरदारी घेण्याचे आणि अशा घटनांना प्रतिबंध घालण्यासाठी ठोस पावले उचलण्याचे निर्देश दिले आहेत. राज्याची सुरक्षा व्यवस्था आणखी मजबूत करण्यावर भर दिला जाईल."

बँक व्यवस्थापकांच्या तक्रारीवरुन या प्रकरणी गुन्हा दाखल करण्यात आला आहे. आरोपींना लवकरात लवकर पकडण्यासाठी एक विशेष तपास पथक तयार करण्यात आले आहे. हे पथक आरोपींचा माग काढण्यासाठी विविध ठिकाणी धाडी टाकत आहे. पोलिसांच्या मते, आरोपी हे व्यावसायिक गुन्हेगार असावेत, ज्यांना बँकेच्या सुरक्षेच्या नियमांची आणि कामकाजाच्या वेळांची माहिती असावी.

राज्याच्या मुख्यमंत्र्यांनी स्वतः लक्ष घातल्यामुळे या प्रकरणाचा तपास अधिक वेगाने होईल अशी अपेक्षा आहे. जनतेमध्ये सुरक्षिततेची भावना पुन्हा निर्माण करण्यासाठी आणि अशा गुन्हेगारांना योग्य शिक्षा देण्यासाठी पोलिसांना लवकरात लवकर यश मिळवावे लागेल. हा दरोडा केवळ एका बँकेवर झालेला हल्ला नसून तो राज्याच्या कायदा आणि सुव्यवस्थेसाठी एक मोठे आव्हान आहे.

विजयपुरासारख्या तुलनेने शांत भागात अशा प्रकारची मोठी घटना घडल्यामुळे स्थानिक जनतेमध्ये भीतीचे वातावरण पसरले आहे. बँक कर्मचाऱ्यांवर झालेला हल्ला आणि दरोड्याची रक्कम पाहून लोक हादरले आहेत. सरकारने आणि पोलिसांनी तातडीने कठोर पावले उचलून आरोपींना पकडावे, अशी मागणी आता जोर धरत आहे.