3400 Lipstick Kisses On Car Viral Video MP: मध्य प्रदेशातील ग्वाल्हेर येथे सोशल मीडियावर रील बनवून व्हायरल होण्याचा प्रयत्न एका तरुणाच्या चांगलाच अंगलट आला. इंस्टाग्रामवर फॉलोअर्स वाढवण्यासाठी या पठ्ठ्याने आपल्या कारवर तब्बल 3400 वेळा किस करुन घेतल्याचा व्हिडिओ तयार केला होता. मात्र या अनोख्या आणि धक्कादायक प्रयोगामुळे तरुणाची चांगलीच पंचाईत झाली. या व्हिडिओने सोशल मीडियावर एकाच दिवसात तब्बल 55 लाखांहून अधिक व्ह्यूज मिळवत खळबळ उडवून दिली खरी, पण त्यानंतर पोलिसांनी पठ्ठ्याची जिरवली.

व्हायरल व्हिडिओ पाहिल्यानंतर ग्वाल्हेरच्या वाहतूक पोलिसांनी तात्काळ कारवाई करत चालकाला कारसह ताब्यात घेवून 5500 रुपयांचा ऑन-द-स्पॉट दंड ठोठावला.

हे संपूर्ण प्रकरण ग्वाल्हेर येथील आदित्य सिकरवार या तरुणाशी संबंधित आहे. सोशल मीडियावर स्वतःचे फॉलोअर्स वाढवण्यासाठी त्याने एक अजब प्लान आखला होता. त्याने आपल्या मैत्रिणीच्या मदतीने सुमारे चार तास मेहनत घेऊन कारच्या प्रत्येक भागावर किस करुन घेतले. त्यानंतर हा तरुण ती कार अत्यंत वेगाने रस्त्यावर पळवत रील शूट करत होता. व्हिडिओमध्ये कारचा नोंदणी क्रमांक स्पष्ट दिसत होता. हा व्हिडिओ सोशल मीडियावर व्हायरल झाल्यानंतर ग्वाल्हेर वाहतूक पोलिसांचे यावर लक्ष गेले.

पोलिसांनी (Police) व्हिडिओतील गाडीच्या क्रमांकावरुन वाहनाचा शोध घेतला आणि थाटीपूर परिसरातून आदित्य सिकरवारला कारसह ताब्यात घेतले. भरधाव वेगाने गाडी चालवणे आणि वाहतूक नियमांचे उल्लंघन केल्याप्रकरणी मोटार वाहन कायद्यानुसार 5500 रुपयांचा दंड ठोठावण्यात आला. पोलिसांची कारवाई इथेच थांबली नाही. वाहतूक पोलिसांनी तरुणाच्या हातात कापड आणि पाण्याची बादली देऊन संपूर्ण कारवरील लिपस्टिकचे डाग स्वच्छ करायला लावले. कारवरील डाग पुसताना तरुणाची चांगलीच दमछाक झाली.

वाहतूक पोलीस ठाण्याचे प्रभारी अभिषेक रघुवंशी यांनी स्पष्ट केले की, केवळ सोशल मीडियावर व्हायरल होण्यासाठी किंवा प्रसिद्धी मिळवण्यासाठी वाहतुकीच्या नियमांची पायमल्ली करणे आणि स्वतःसह इतरांचा जीव धोक्यात घालणे अजिबात सहन केले जाणार नाही. अशा प्रकारची धोकादायक कृत्य करणाऱ्यांवर अधिक कडक कारवाई केली जाईल, असा स्पष्ट इशाराही त्यांनी दिला.