Kanjhawala Incident: दिल्लीतील कांजवाला येथील मुलीवर झालेल्या बलात्कार प्रकरणी गृह मंत्रालयही अ‍ॅक्शन मोडमध्ये आले आहे. वैद्यकीय अहवालाच्या आधारे कांजवाला मृत्यू प्रकरणाचा पुढील तपास केला जाईल, असे पोलिसांनी सोमवारी सांगितले. दरम्यान, स्वतः गृहमंत्र्यांनी या प्रकरणाची दखल घेत एका महिला अधिकाऱ्याला तपास पुढे नेण्याचे आदेश दिले आहेत. गृह मंत्रालयाने विशेष सीपी शालिनी सिंह यांना तपासाचे नेतृत्व करण्याचे आदेश दिले आहेत. त्याचबरोबर यासंबंधीचा रिपोर्ट तात्काळ गृह मंत्रालयाकडे सोपवण्यासही सांगितले आहे.

तत्पूर्वी, डॉ. सागर पी हुडा, विशेष सीपी (एल अँड ओ) झोन II यांनी पत्रकार परिषदेदरम्यान सांगितले की, या प्रकरणाच्या तपासासाठी अनेक पथके तयार करण्यात आली आहेत. या प्रकरणात, एका 20 वर्षीय मुलीला कथितपणे कारने धडक दिल्याने तिचा मृत्यू झाला. दुसरीकडे, या प्रकरणावर बोलताना दिल्लीचे पोलीस (Police) आयुक्त संजय अरोरा म्हणाले की, 'अशा घटनांची पुनरावृत्ती होऊ नये यासाठी कठोर कारवाई करुन एक आदर्श ठेवू.'

काय आहे कांजवाला प्रकरण?

पोलिसांनी सांगितले की, 1 जानेवारी (रविवार) पहाटे स्कूटीवरुन जात असलेल्या 20 वर्षीय मुलीला कारने धडक दिली. मारुती बलेनोमध्ये पाच जण होते, ज्यांनी स्कूटीवरुन जाणाऱ्या मुलीला धडक दिली. या मुलीचा कथित व्हिडिओही सोशल मीडियावर (Social Media) व्हायरल झाला आहे.

शिवाय, पीडितेवर बलात्कार करुन तिची हत्या करण्यात आल्याचा दावाही फुटेजमध्ये करण्यात आला आहे. मात्र पोलिसांनी हा अपघात असल्याचे म्हटले आहे. याप्रकरणी दिल्ली महिला आयोगाने (DCW) पोलिसांना नोटीसही बजावली आहे. पोलिसांनी दिलेल्या माहितीनुसार, कांजवाला पोलिस स्टेशन (रोहिणी जिल्हा) येथे पहाटे 3.24 वाजता कुतुबगढ भागाकडे जाणाऱ्या कारला एक मृतदेह बांधलेला असल्याची माहिती मिळाली.