Jammu And Kashmir: जम्मू-काश्मीरमध्ये दहशतवाद्यांकडून हिंदूंना लक्ष्य करण्याच्या घटना नव्या वर्षात वाढल्या आहेत. या केंद्रशासित प्रदेशात गेल्या दोन दिवसांत 6 हिंदूंची हत्या करण्यात आली आहे. दहशतवादी लहान मुलांनाही सोडत नाहीत. राजौरीतील डांगरी गावात दहशतवादी हल्ल्यात बळी पडलेल्यांच्या घराजवळ सोमवारी आयईडी स्फोट झाला, त्यात 2 मुले ठार आणि 6 जण जखमी झाले. 4 वर्षीय विहान आणि 16 वर्षीय समिक्षा अशी मृतांची नावे आहेत. याशिवाय जखमींमध्ये दोन मुलांचाही समावेश असून त्यांच्यावर उपचार सुरु आहेत.
याआधी, रविवारी संध्याकाळी दहशतवाद्यांनी (Terrorists) याच भागातील तीन घरांवर गोळीबार केला होता, त्यात 4 नागरिक ठार, 6 जण जखमी झाले होते. सतीश कुमार (45), दीपक कुमार (23), प्रीतम लाल (57) आणि शिशुपाल (32) अशी मृतांची नावे आहेत. याशिवाय पवन कुमार (38), रोहित पंडित (27), सरोज बाला (35), रिदम शर्मा (17) आणि पवन कुमार (32) अशी जखमींची नावे आहेत. या दोन्ही दहशतवादी घटना अवघ्या 14 तासांच्या अंतराने घडल्या आहेत.
प्रत्यक्षदर्शींनी दावा केला की, दहशतवादी हल्ल्यातील बळी प्रीतम लाल यांच्या घराजवळ आज सकाळी स्फोट झाला. मृतांव्यतिरिक्त, सर्व जखमी देखील हिंदू आहेत, ज्यांची ओळख सानवी शर्मा (4), कनया शर्मा (14), वंशू शर्मा (15), समिक्षा देवी (20), शारदा देवी (38), कमलेश देवी (55) आहेत. .आणि समिक्षा शर्माच्या रुपात झाली. मात्र, समिक्षा शर्मा यांचा उपचारादरम्यान मृत्यू झाला. प्रत्यक्षदर्शींनी सांगितले की, सोमवारी सकाळी 9 ते 9.30 च्या दरम्यान हा स्फोट झाला जेव्हा रविवारच्या हल्ल्यातील पीडितेच्या नातेवाईकांसह अनेक लोक घरात उपस्थित होते.
सरपंच दीपक कुमार म्हणाले की, पोलिस आणि सुरक्षा यंत्रणांच्या सुरक्षेतील ही गंभीर त्रुटी आहे. ते पुढे म्हणाले की, अल्पसंख्याक समाजातील लोकांना सुरक्षित वाटत नाही. प्रशासनाने कठोर पावले उचलावीत. त्याचवेळी लेफ्टनंट गव्हर्नर मनोज सिन्हा यांनी जम्मू-काश्मीरच्या (Jammu And Kashmir) डांगरी गावात झालेल्या दहशतवादी हल्ल्यात सहभागी असलेल्यांना सोडले जाणार नाही, असे म्हटले आहे. या घटनेत मृत्युमुखी पडलेल्या नागरिकांच्या नातेवाईकांना 10 लाख रुपये आणि सरकारी नोकरीची घोषणा त्यांनी केली.
हिंदूंवरील हिंसाचाराच्या विरोधात राजौरी शहरासह जिल्हाभरात निदर्शने सुरु झाली आहेत. हे लोक त्यांच्या सुरक्षिततेची आणि न्यायाची मागणी करत आहेत. दरम्यान, एनआयएचे एक पथक डांगरी येथे पोहोचले असून प्राथमिक तपास सुरु आहे. त्याचवेळी जम्मूचे विभागीय आयुक्त रमेश कुमार यांच्यासह वरिष्ठ पोलीस अधिकारीही घटनास्थळी पोहोचले आहेत. ते म्हणाले की, लष्कर आणि पोलिस मोठ्या प्रमाणावर शोध मोहीम राबवत आहेत. या प्रकरणाची चौकशी करण्यात येत असून संपूर्ण परिसराची नाकाबंदी करण्यात आली असल्याचे त्यांनी सांगितले.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
